Höfðaskóli
Tilkynningar
-
Einkunnarorð skólans eru: styrkur - vinsemd - virðing
-
Skóladagatal 2025-2026, smelltu hér
Fréttir
-
Föstudagskveðja
17.04.2026Sæl öll Mánudagurinn hófst á innanhúsmóti í skák en þar kepptu nemendur 1.-4.bekkjar, 5.-7.bekkjar og 8.-10.bekkjar (myndir hér) um sæti til að komast áfram á Meistaramót Norðurlands vestra í skólaskák sem haldið var í Húnaskóla miðvikudaginn sl. Fjórir nemendur, Katrín Sara, fóru frá Höfðaskóla og komst Elís Valtýsson á pall en hann var í 2.-4. sæti meðal nemenda í 1.-4. bekk. (myndir hér) Nemendum skólans fannst þetta skemmtilegt og sjáum við fram á að gera þetta að árlegum viðburði og flétta skák meira í nám nemenda okkar. Nemendur miðstigs voru með kynningu fyrir forráðafólk á þemaverkefni sem ber heitið "Ferðalag". Var þar hægt að koma og sjá verkefnin þeirra, skipulag utanlandsferða og nákvæma kostnaðaráætlun. (myndir hér) Nemendur 10. bekkjar fengu frábæra kennslu hjá Herdísi Steinsdóttur og Grigory Solomatov á vísindadegi í Biopol í gær. Nemendurnir unnu í tölvuleikjakóðun og örverufræði. Frábært samstarf og þökkum við kærlega fyrir. Vonandi verða verkefni sem þessi áregur viðburður. Það var vor í lofti þessa vikuna og voru nemendur skólans dugleg að vera utandyra eins og sjá má á myndunum sem teknar voru að nemendum yngsta stigs þegar þau fóru í göngutúr inn að á. (myndir hér) Næsta vika verður stutt og laggóð, sumardagurinn fyrsti er fimmtudaginn 23.apríl og starfsdagur föstudaginn 24.apríl. Með óskum um góða helgi Guðrún Elsa og Berglind Hlín -
Föstudagskveðja
10.04.2026Kæru foreldrar og forráðamenn, Að baki er óvenju stutt vika í skólastarfinu okkar. Þriðjudaginn sl. snéru nemendur og starfsfólk úr páskafríi. Það fór ekki á milli mála að nemendur höfðu notið hvíldarinnar og sum enn hálf súkkulaðihúðuð. Aðeins rofaði til milli gulra veðurviðvarana og nýttum við dagana til að vera mikið úti. Fram undan er spennandi vika þar sem mánudaginn 13. apríl munum við halda skólaskákmót hér í Höfðaskóla fyrir alla þá nemendur sem hafa áhuga á að spreyta sig við taflborðið. Teflt verður í þremur einstaklingsflokkum og er dagskráin eftirfarandi: 5.–7. bekkur: kl. 08:20 1.–4. bekkur: kl. 10:40 8.–10. bekkur: kl. 11:20 Umhugsunartími á hverja skák verður 5 mínútur að viðbættum 2 sekúndum á hvern leik. Tveimur efstu keppendum úr hverjum flokki stendur til boða að fara áfram og keppa fyrir hönd skólans á Meistaramóti Norðurlands vestra í skólaskák. Það mót fer fram miðvikudaginn 15. apríl í Húnaskóla á Blönduósi. Nemendur eru farnir að mæta á reiðhjólum í skólann og minnum við á að ávallt eiga reiðhjólahjálmar að vera með í för. Með óskir um góða helgi Guðrún Elsa og Berglind Hlín -
Föstudagskveðja fyrir páskafrí
27.03.2026Síðasta vikan fyrir páskafrí var lífleg og skemmtileg hjá okkur. Nemendur unnu ýmis verkefni myndir hér og föndruðu páskaskraut. Myndir hér. Við skunduðum af stað í Tindastól sl. mánudag og renndum okkur þar á hverskyns skíðabúnaði. Nemendur skemmtu sér mjög vel og stefna mörg að því að skella sér aftur á skíði um páskana. Við þökkum Fram kærlega fyrir og þökkum foreldrunum sem gátu gefið sér tíma og farið með einnig kærlega fyrir. Myndir hér Í dag var páskabingó fyrir alla nemendur skólans og voru vinningarnir páskaegg sem Samkaup úrval á Skagaströnd og Skagfirðingabúð á Sauðárkróki sem gáfu vinninga. Myndir hér Við höldum svo í páskafrí eftir daginn í dag og mætum aftur í skólann þriðjudaginn 7. apríl. Við vonum að þið eigið góða páska og hlökkum til að hitta nemendur endurnærð eftir gott frí Með páskakveðju Guðrún Elsa og Berglind Hlín -
Föstudagskveðja
20.03.2026Enn ein vikan í skólastarfinu er senn á enda, mars meira en hálfnaður og páskarnir handan við hornið. Í vikunni hafa veðurguðirnir svo sannarlega látið að sér kveða. Við höfum upplifað allt frá mikilli rigningu og asahláku yfir í frost og snjókomu á víxl, sem hefur krafist þess að allir væru vel búnir og tilbúnir í margvísleg útiveruævintýri. Vegna þessa ófyrirsjáanlega veðurfars þurftum við að aflýsa fyrirhugaðri ferð unglingastigsins á valgreinadag á Hvammstanga síðastliðinn fimmtudag. Við höfum þegar hafið vinnu við að finna nýja dagsetningu og munum auglýsa hana um leið og hún liggur fyrir. Varðandi næstu viku þá eru nokkrar breytingar á áður auglýstri dagskrá. Við höfum ákveðið að fresta list- og verkgreinavikunni sem átti að fara fram í næstu viku. Okkur þykir mikilvægt að vanda vel til verka í þeirri vinnu og höfum því fært vikuna fram á vorið þar sem hún fær betra svigrúm. Ný dagsetning verður kynnt nemendum og foreldrum síðar. Á mánudaginn næstkomandi stendur til að fara í skíðaferð í boði ungmennafélagsins Fram. Við erum afar þakklát fyrir þetta frábæra framtak og vonumst til þess að sem flestir geti notið þess að vera á skíðum í góðum félagsskap. Við krossum nú fingur og vonum að veðrið verði okkur hliðhollt svo þessi dagur verði sem ánægjulegastur fyrir börnin. Við þökkum ykkur kærlega fyrir gott samstarf og óskum ykkur góðrar helgar Guðrún Elsa og Berglind Hlín -
Skíðaferð 23.mars
17.03.2026SKÍÐAFERÐ 23. MARS 2024 Kl. 13:00–17:00 Mánudaginn 23. mars stendur Ungmennafélagið Fram fyrir skíðaferð í Tindastól. Ferðin er farin í samvinnu við Höfðaskóla og er nemendum skólans að kostnaðarlausu, en Fram mun greiða fyrir rútuferð, aðgang í fjallið og leigu á búnaði fyrir þá sem þurfa. Farið verður frá Höfðaskóla kl. 13:00 og komið til baka kl. 17:00. Ef nemendur vilja fara með í ferðina þurfa foreldrar/forráðamenn að senda inn skráningu í gegnum heimasíðu skólans. Tekið verður við skráningum til kl. 12:00 föstudaginn 20. mars. Skráning HÉR Það sem þarf að hafa meðferðis að heiman er nesti fyrir daginn, hlý föt og gott skap. Ef einhverjir foreldrar hafa tök á að fara með og aðstoða þiggjum við það með þökkum. -
Föstudagskveðja
13.03.2026Kæru foreldrar og forráðamenn, Að baki er annasöm vika. Hjá nemendum í 4.–10. bekk hefur vinnan við Matsferil Menntamálastofnunar verið í forgrunni. Lagt er mat á lesskilning og stærðfræði og hafa sumir hópar þegar lokið sínum prófum á meðan aðrir eiga þau eftir. Við höfum til loka marsmánaðar til að ljúka þessum prófum. Á yngsta stigi ríkti mikil gleði og eftirvænting í vikunni. Finnbogi undirbjó sérstakan íþróttadag þar sem nemendur fóru í íþróttahúsið og skemmtu sér konunglega ásamt starfsmönnum frístundar. Þá vakti það gríðarlega lukku þegar yngstu nemendurnir fengu að heimsækja geiturnar hennar Dagnýjar. Myndir hér Við viljum einnig deila því með ykkur að framkvæmdir innanhúss ganga vonum framar. Smiðir eru nú nánast búnir að setja upp nýtt kerfisloft og LED lýsingu í allar kennslustofur, ásamt því að endurnýja lýsingu í eldhúsi, matsal og í forstofu nemenda. Þetta mun bæta vinnuumhverfi barnanna til muna og skapa bjartara og þægilegra námsumhverfi. Fram undan er spennandi vika. Á fimmtudaginn næstkomandi fer unglingastigið í heimsókn á Hvammstanga. Þar verður haldinn sameiginlegur valgreinadagur þar sem nemendur frá Skagaströnd, Blönduósi og Hvammstanga hittast og vinna saman að skemmtilegum verkefnum. Þetta er frábært tækifæri fyrir nemendur til að efla félagsleg tengsl og kynnast jafnöldrum sínum á svæðinu. Sama dag, fimmtudaginn, verður tvöfaldur vinnudagur hjá starfsfólki Höfðaskóla. Unnið verður til klukkan 19:00 og fá starfsmenn í staðinn frí 24. apríl næstkomandi. Að lokum viljum við minna á að undanfarna daga hefur verið mikill snjór og bleyta utandyra. Þar sem börnin eru dugleg að fara út er mjög gott að þau hafi auka sokka og jafnvel auka vettlinga með sér í skólann svo þau geti verið þurr og hlý allan daginn. Við þökkum ykkur fyrir gott samstarf og óskum ykkur gleðilegrar helgar. Guðrún Elsa og Berglind Hlín
