Fréttir

Þá er skólavikan að renna sitt skeið og vetrarfrí hjá nemendum og starfsfólki handan við hornið en frí verður á mánudag og þriðjudag. Í vikunni var ýmislegt fróðlegt og skemmtilegt brallað. Nemendur unnu ýmis verkefni innandyra og utan og nemendur í 8.-10. bekk svöruðu íslensku æskulýðsrannsókninni. Í list- og verkgreinum unnu nemendur fjölbreytt verkefni og á myndinni sem fylgir fréttinni má sjá afrakstur vinnu í textíl hjá nemendum á miðstigi. Veðrið hefur leikið við okkur og verið hálfgert vor í lofti þrátt fyrir að við séum stödd í febrúar. Nemendur hafa sumir hverjir dregið fram hjólin sín og því minnum við á mikilvægi þess að nemendur séu með hjálma þegar hjólað er. Í gær stóð nemendafélagið fyrir bíó kvöldi fyrir nemendur á miðstigi sem heppnaðist mjög vel, nemendur horfðu á myndina Goosbumps og fengu popp og drykk. Næsta vika verður stutt v. vetrarfrís en föstudaginn 28. febrúar verður glitrandi dagur í Höfðaskóla en þann dag tökum við þátt í viðburði Einstakra barna þar sem markmiðið er að vekja athygli á sjaldgjæfum sjúkdómum og heilkennum. Við hvetjum öll til að sýna stuðning og mæta í einhverju glitrandi í skólann þann dag. Við vonum að þið njótið vetrarfrísins Með góðum kveðjum Sara Diljá, Guðrún Elsa og Berglind Hlín

Í dag fór yngsta stig inn að Hrafná. Tilgangur ferðarinnar var að nýta góða veðrið og safna skeljum sem við ætlum að reyna að föndra úr seinna. Hrafná og fjaran er endalaus uppspretta ævintýra og margt sem heillar. Í dag var sko lukkan heldur betur með hópnum þegar forvitinn selur fór að fylgjast með krökkunum. Hann synti fram og aftur, veifaði okkur og kom mjög nálægt landi. Þegar hann stakk höfðinu upp úr til að kíkja á krakkana hoppuðu þau af kæti yfir þessum forvitna félaga. Frábær ferð þrátt fyrir nokkrar blautar tásur

Sæl öll Það hefur verið einstakt veður að undanförnu, daginn er farinn að lengja og vorið minnir á sig. Við fengum til okkar öfluga gesti frá björgunarsveitinni, slökkviliðinu og lögreglunni, sem fræddu okkur um mikilvægt öryggisstarf. Nemendur fengu að skoða spennandi búnað, setjast inn í neyðartæki. Það var sérstaklega skemmtilegt að sjá hversu áhugasamir nemendur voru og hversu margar góðar spurningar þeir höfðu. Í næstu viku munu nemendur í 10. bekk leggja leið sína á Sauðárkrók þar sem þeir fá tækifæri til að kynna sér Fjölbrautaskóla Norðurlands vestra (FNV) og njóta skemmtilegrar leiksýningar, Rocky Horror. Við minnum á holla og góða hafragrautinn okkar sem og ávextina í morgunkaffinu að ógleymdum ljúffengum hádegismat í Fellsborg. Njótið helgarinnar og mætum endurnærð inn í nýja viku! Með bestu kveðju Sara Diljá, Guðrún Elsa og Berglind Hlín

Í dag er 1-1-2 dagurinn, eins og segir á heimasíðu neyðarlínunnar er haldið upp á 112 þann 11. febrúar á hverju ári því að dagsetningin 11. 2. minnir okkur á neyðarnúmer allra landsmanna, 112. Það er mikilvægt að minna á þetta númer af því þetta er eina númerið sem landsmenn þurfa að þekkja í neyð. Við fengum í heimsókn til okkar slökkvilið, lögreglu og björgunarsveit, nemendur fengu að fara út og skoða bílana og spjalla við viðbragðsaðila. Vinir okkar af leikskólanum komu einnig og skoðuðu bílana sem var mjög skemmtilegt. Myndir hér.

Nú er frost á Fróni, frýs í æðum blóð, kveður kuldaljóð Kári í jötunmóð. Yfir laxalóni liggur klakaþil, hlær við hríðarbyl hamragil. Mararbára blá brotnar þung og há unnarsteinum á, yggld og grett á brá. Yfir aflatjóni æðrast skipstjórinn, harmar hlutinn sinn hásetinn. Horfir á heyjaforðann hryggur búandinn: ,,Minnkar stabbinn minn, magnast harðindin. – Nú er hann enn á norðan, næðir kuldaél, yfir móa og mel myrkt sem hel.“ Bóndans býli á björtum þeytir snjá, hjúin döpur hjá honum sitja þá. Hvítleit hringaskorðan huggar manninn trautt; Brátt er búrið autt, búið snautt. Þögull Þorri heyrir þetta harmakvein gefur grið ei nein, glíkur hörðum stein, engri skepnu eirir, alla fjær og nær kuldaklónum slær og kalt við hlær: ,,Bóndi minn, þitt bú betur stunda þú. Hugarhrelling sú, er hart þér þjakar nú, þá mun hverfa, en fleiri höpp þér falla í skaut. Senn er sigruð þraut, ég svíf á braut“. Góða helgi frá starfsfólki Höfðaskóla

SKÓLAHALD FELLUR NIÐUR Á MORGUN, FIMMTUDAG. Samkvæmt ráðleggingu frá almannavörnum og lögreglu hefur verið tekin ákvörðun um að aflýsa skóla á morgun, fimmtudag.

Glatt var á hjalla hjá nemendum á yngsta stigi í dag þegar fagnað var þorranum með þorrablóti. Stemningin var einstaklega góð og það var augljóst að nemendur voru spenntir að kynnast gömlum íslenskum matarhefðum og bragða á þorramatnum. Margir nemendur sýndu mikla hugrekki þegar kom að því að smakka á framandi mat sem þau höfðu sum hver aldrei séð áður. Sérstaka athygli vakti hákarl sem margir nemendur voru forvitnir að prófa, þó sumir hafi tekið sér góðan tíma í að safna kjarki. Það var mjög gaman að sjá hvað krakkarnir voru dugleg að prófa eitthvað nýtt. Harðfiskurinn stal þó ótvírætt senunni og reyndist vera vinsælasti rétturinn á hlaðborðinu. Nemendur röðuðu sér margoft í biðröð til að fá sér meira af honum. Einnig vakti mikla lukku flatbrauð með hangikjöti, sem margir nemendur sögðu að væri "alveg rosalega gott." Meðan á blótinu stóð fengu nemendur fræðslu um þorrann og gamlar íslenskar matarhefðir. Krakkarnir hafa verið að læra um uppruna þorrans og af hverju Íslendingar borðuðu þennan mat og því gott að enda á einu góðu þorrablóti.

Í dag fór Berglind Hlín yfir niðurstöður úr lestrarsprett janúarmánaðar. Yngsta stig stóð uppi sem sigurvegari en þau lásu samtals 7072 mínútur - vel gert! Mið- og unglingastig stóðu sig einnig með prýði. Til hamingju öll - lestur er bestur.

Kæru foreldrar og forráðamenn. Gleðilegan föstudag! Skemmtileg og viðburðarík vika sem er að líða. Við fengum þann heiður að fá rithöfundinn Þorgrím Þráinsson í heimsókn til nemenda í 5.-7. bekk. Heimsóknin var einstaklega vel heppnuð og nemendur sýndu mikinn áhuga og tóku virkan þátt í umræðum. Það var ánægjulegt að sjá hversu vel þau nýttu tækifærið til að spyrja Þorgrím spurninga um rithöfundarstarfið og bækur hans. Eftir heimsóknina setti Sandra bókavörður upp horn á bókasafninu tileinkað bókunum hans Þorgríms. Við höfum nú lokið lestrarprófi allra nemenda skólans og erum mjög ánægð með árangurinn. Seinni hópur valgreina á unglingastigi hóf störf í vikunni og gaman er að sjá hversu áhugasamir nemendur eru í þessum fjölbreyttu námsgreinum. Vegna síbreytilegra veðurskilyrða viljum við minna á mikilvægi þess að nemendur séu vel búnir fyrir útiveru. Við mælum sérstaklega með því að hafa auka sokkapar í töskunni, þar sem blaut föt geta haft áhrif á líðan barnanna yfir skóladaginn. Það er ánægjulegt að sjá hversu vel nemendur hafa tekið morgunmatnum, en hafragrauturinn og ávextirnir hafa notið mikilla vinsælda. Fyrir nemendur 10. bekkjar er spennandi vika framundan. Þau fá heimsókn frá Fjölbrautaskóla Norðurlands vestra þann 4. febrúar og daginn eftir, þann 5. febrúar, eru þau boðin í heimsókn í Menntaskóla Borgarfjarðar. Þetta eru mikilvægir viðburðir fyrir framtíðarákvarðanir nemenda og hlökkum við til að fylgjast með þeim í þessum spennandi heimsóknum. Við viljum þakka ykkur fyrir gott samstarf og hvetjum ykkur til að hafa samband ef spurningar vakna. Með bestu kveðju og ósk um góða helgi Sara Diljá, Guðrún Elsa og Berglind Hlín

Tveir hópar af yngsta stigi fóru í dag í listamiðstöðina og hittu þar listakonurnar Helle (frá DK) og Mariu (frá Puerto rico). Þær kenndu nemendum að búa til sólarprent/cyanotype. Allir stóðu sig vel og höfðu mjög gaman af.