Fréttir

Á morgun er síðasti skóladagurinn fyrir jólafrí. Nemendur verða með sínum umsjónarkennurum frá 8:20-12:00, frístund verður með hefðbundnu sniði eftir hádegi og svo hefjast litlu jólin í skólanum kl. 17:00. Við höldum svo í Fellsborg og borðum hátíðarkvöldverð og dönsum kringum jólatréð. Eftir það halda nemendur og starfsfólk í jólafrí. Við óskum ykkur gleðilegra jóla og farsældar og komandi ári. Takk fyrir samstarfið á árinu. Við hlökkum til að hitta nemendur aftur, mánudaginn 6. janúar kl. 8:20. Við vonum að þið njótið hátíðanna Jólakveðja frá starfsfólki Höfðaskóla

Vikan í Höfðaskóla var lífleg og skemmtileg og margt um að vera eins og sjá má á heimasíðunni okkar. Við höfum sett inn mikið af myndum og fréttum og hvetjum ykkur til að vera dugleg að skoða það allt saman. Í gær vorum við með jólaföndurstöðvar og þrautabraut í íþróttahúsinu sem gekk mjög vel hjá okkur. Myndir frá því eru hér. Í dag ætlum við svo að fá okkur heitt kakó og piparkökur sem við höfum gert árlega í desember undanfarin ár. Næsta vika er svo síðasta vikan fyrir jólafrí, en hún er stutt í annan endan þar sem litlu jólin okkar eru 18. desember og nemendur fara í jólafrí eftir þau. Á mánudag ætla drengirnir okkar í 10. bekk að skreyta jólatréð okkar, á þriðjudag er engin kennsla eftir hádegi en frístund með hefðbundnu sniði og á miðvikudag ætlum við að syngja saman jólalög, eiga notalega stund í stofum með umsjónarkennurum og fara svo öll saman í möndlugraut upp í Fellsborg í hádeginu. Engin kennsla eftir hádegi en frístund með hefðbundnu sniði. Litlu jólin hefjast svo 18. desember kl. 17:00 og mæta nemendur í skólann. Við ætlum svo að borða saman hátíðarkvöldverð í Fellsborg og dansa í kringum jólatréð en Hugrún Sif ætlar að leiða jólasönginn. Þar sem litlu jólin eru með breyttu sniði og hátíðlegri en undanfarin ár viljum við biðja nemendur um að mæta prúðbúin og snyrtileg. Litlu jólunum lýkur svo um kl. 20:00 og þá halda nemendur heim í jólafrí. Við erum orðin öllu vön og langtímaspáin er okkur ekki sérstaklega hliðholl þennan dag, en þar sem langt er í þetta ennþá vonum við að það breytist nú og við getum haldið þessa stund eins og til stendur. Að lokum minnum við á að foreldrar og forráðamenn eru alltaf velkomin í heimsókn til okkar, ekki þarf að gera boð á undan sér. Hvort sem það er til að kíkja í kaffibolla eða sjá það sem nemendur eru að fást við. Gleðilegan þriðja sunnudag aðventu Með góðum kveðjum Sara Diljá, Guðrún Elsa og Berglind Hlín

Á dögunum fengum við nýjan vatnsbrunn í gjöf frá Kvenfélaginu Einingu hér á Skagaströnd. Gamli brunnurinn var kominn til ára sinna og gjöfin mjög kærkomin og mun koma að góðum notum. Á myndinni er Gígja Heiðrún Óskarsdóttir kvenfélagskona ásamt nokkrum nemendum skólans við nýja vatnsbrunninn. Takk kærlega fyrir okkur.

Nemendur á yngsta stigi fóru í fjöruferð í gær. Mjög skemmtileg tilbreyting. Myndir hér.

Nemendur á yngsta stigi fóru í skemmtilega heimsókn á Sæborg núna í morgun. Þau sungu jólalög, fengu heitt kakó og smákökur, myndir til að lita og allir fengu eina rallyferð í með göngugrindinni. Mjög skemmtilegt. Myndir hér.

Það hefur svo sannarlega verið jólalegt hjá okkur í Höfðaskóla í morgunsárið. Fyrst las Sandra bókavörður jólasögu fyrir nemendur og að því loknu komu Hugrún Sif og Elvar Logi og leiddu jólasöng.

Mörgæsir á hálum ís - verkefni hjá yngsta stigi í myndmennt :) Myndir hér.

Nú er undirbúningur fyrir litlu jólin okkar í fullum gangi, þau verða með breyttu sniði í ár þar sem við ætlum að hittast seinnipart dags, borða saman hátíðarkvöldverð og vera svo með smá jólaball. Skólastjóri fékk í dag frábæra aðstoð frá fjórum nemendum unglingastigs við að útbúa ís sem verður í eftirrétt. Nemendur stóðu sig frábærlega í ísgerðinni :)

Þá er desember genginn í garð og spennan fyrir jólunum eykst með hverjum deginum sem líður. Í dag kom skólablaðið Höfðafréttir út, en það má sjá hér. Í vikunni var fullt um að vera og við erum dugleg að setja inn fréttir á heimasíðuna og hvetjum ykkur til að fylgjast með. Hafdís lestraramma kom í heimsókn í vikunni, það er alltaf gaman þegar hún kemur í heimsókn og hittir nemendur. Mánudaginn 9. desember n.k. verða jólaljósin tendruð á jólatrénu á Hnappstaðatúni. 1. bekkur sér um að aðstoða Alexöndru sveitarstjóra við að tendra ljósin og eiga þau að mæta rétt fyrir kl. 17:00. Við höfum hægt og rólega verið að vinna í að endurgera jólamyndirnar sem voru í gluggum skólans hér á árum áður. Nokkrar myndir eru komnar upp á vesturhlið skólans og hvetjum við ykkur til að skoða þær :) Breytingin á nestismálum hefur farið vel af stað og erum við að finna okkar takt í þessu öllu saman. Jólatónleikar tónlistarskólans voru í gær og stóðu nemendur sig með stakri prýði. Það er alltaf hátíðlegt að mæta á jólatónleikana þeirra og sjá þau spila og syngja. Í næstu viku er jólapeysudagur á mánudag og hvetjum við öll til að mæta í jólapeysum. Á miðvikudag ætlum við að hlusta á jólasögu hjá Söndru og syngja með Hugrúnu og Elvari, á fimmtudag ætlum við að vera með smá jólaföndur og á föstudag ætlum við að fá okkur heitt kakó og piparkökur - semsagt, alltaf nóg um að vera. Næsta vika er síðasta heila skólavikan á þessu ári, litlu jólin okkar verða svo 18. desember en allar nánari upplýsingar um þau koma í næstu viku. Við vonum að þið njótið helgarinnar Gleðilegan annan sunnudag í aðventu Með góðri kveðju Sara Diljá, Guðrún Elsa og Berglind Hlín

Þá er komið að því að þriðja skólablað Höfðafrétta er nú komið út og er aðgengilegt hér.