Fréttir

Nemendur í bakstursvali fóru í heimsókn í Sauðárkróksbakarí fyrir helgi og fengu að skoða allt bakvinnslusvæðið ásamt því að fá góða fræðslu frá Snorra bakara. Heimsóknin var skemmtileg og að sjálfsögðu settumst við svo niður í lokinn og gæddum okkur á góðgæti úr bakaríinu. Hver veit nema að það leynist bakari í hópnum. Bestu þakkir fyrir okkur Snorri og allir hinir í Sauðárkróksbakaríi.

Þá er enn ein skólavikan að renna sitt skeið, óhefðbundin v. frídags í gær. Í maí er gjarnan mikið um að vera í skólanum og að mörgu að hyggja áður en nemendur halda út í sumarið. Í vikunni fengu nemendur í 4.-7. bekk heimsókn frá lögreglunni, frétt frá því hér. Þá var íþróttadagur miðstigs haldinn hér hjá okkur og komu nemendur úr Húnaskóla og Grunnskóla Húnaþings vestra í heimsókn. Dagurinn var vel heppnaður og alltaf gott að hitta jafnaldra og gera sér glaðan dag. Nokkrar myndir hér. Skipulag næsta skólaárs er í fullum gangi og vonumst við til að geta kynnt valgreinar sem í boði verða fyrir nemendum í næstu viku og leyft þeim að velja. Veðrið er gott og nemendur eru duglegir að mæta á hjólum í skólann sem er frábært. Við minnum á að notkun hjálma er skylda. Við vonum að þið njótið helgarinnar Með góðum kveðjum Sara Diljá og Guðrún Elsa

Nemendur í 4. - 7. bekk fengu skemmtilega heimsókn s.l. þriðjudag. Lögreglan kom og var með ýmiskonar fræðslu, Kahoot og í lokin var boðið upp á hjólaskoðun fyrir þau sem það vildu. Við þökkum Söru og Ásdísi fyrir komuna. Myndir hér.

Nú er maí genginn í garð (loksins myndu sumir segja) og veðrið hefur leikið við okkur undanfarna daga. Vikan var óhefðbundin þar sem 1. maí bar upp á miðvikudegi og því var frí þann dag. Í maí lengist útivisvartími barna og það fer gjarnan að bera á því að þau séu þreytt þegar þau koma í skólann eftir útiveru kvöldinu áður. Við biðjum foreldra að gæta þess að börnin séu ekki of lengi úti og fari þ.a.l. seint að sofa þó það sé erfitt að halda í við þau í blíðunni. Framundan hjá okkur er ýmislegt skemmtileg. Nemendur í 5.-7. bekk munu taka þátt í íþróttadegi miðstigs með Húnaskóla og Grunnskóla Húnaþings vestra en dagurinn verður haldinn hér hjá okkur n.k. þriðjudag og verður dagskráin frá 13:00-16:00. Við munum fá heimsókn frá lögreglunni sem kemur með rafhlaupahjólafræðslu og ýmislegt fleira. Nemendur í 9. og 10. bekk fara svo í ferð til Danmerkur dagana 21.-25. maí, svo það er nóg framundan. Í næstu viku kemur aftur rauður dagur en fimmtudaginn 9. maí er uppstigningardagur og því verður ekki skóli þann dag. Við vonum að þið njótið helgarinnar í veðurblíðunni Með góðum kveðjum Sara Diljá og Guðrún Elsa

Stutt vika þessa vikuna, sumardagurinn fyrsti á morgun og skipulagsdagur á föstudaginn sem starfsfólk hefur unnið af sér. Það eru því allir á leið í langt helgarfrí eftir daginn í dag. Þrátt fyrir stutta viku var ýmislegt um að vera eins og vant er. Á mánudaginn fengu nemendur í 7.-10. bekk kynningu frá SSNV og í gær fóru nemendur í. 8.-10. bekk á valgreinadag í Húnabyggð. Myndir frá því hér. Ritstjórn Höfðafrétta hefur nú lagt lokahönd á skólablað vorsins sem farið er í prentun og verður borið út á öll heimili á Skagaströnd og í Skagabyggð. Við hlökkum til að sýna ykkur afraksturinn en nemendur hafa staðið sig mjög vel við gerð blaðsins og mega vera stolt af því. Í næstu viku kemur Ármann Óli sjúkraflutningamaður í heimsókn og fer yfir starf sitt sem slíkur í valgreininni starfakynningar, það verður án efa mjög fróðlegt og skemmtileg. Næsta vika verður tvískipt, frídagur á miðvikudaginn þar sem 1. maí ber upp þann dag. Semsagt, maí er handan við hornið, sólin hækkar og hækkar á lofti og áður en við vitum af verður komið að skólaslitum. Það er þó nóg eftir fram að því. Við vonum að þið njótið helgarinnar Með góðum kveðjum Sara Diljá og Guðrún Elsa

Í lotutímum höfum við í 6. og 7. bekk verið að vinna verkefni um sólkerfið. Farið var yfir pláneturnar í sólkerfinu okkar í bókinni Náttúrulega 2 og í lokin unnu nemendur í hópum og gerðu sínar útgáfur af sólkerfinu. Voru þau áhugasöm við gerð þessara verkefna.

Nemendur á yngsta stigi hafa heldur betur nýtt sólina í dag til útiveru. Hópurinn fór saman inn að Hrafná og var nú aldeilis gaman að garfa og grufla í fjörunni.

Nemendur í 1.-3 bekk leiruðu fallegar sumarskálar og blómavasa í myndmennt. Vel við hæfi rétt fyrir sumardaginn fyrsta.

Krakkarnir í 1. bekk voru að vinna með bókina Gula sendibréfið eftir Sigrúnu Eldjárn. Þau skrifuðu bréf og bjuggu til umslag, fengu frímerki og fóru síðan með bréfið sitt í póstkassann. Þetta vakti mikla lukku hjá þeim og heppnaðist vel.

Áfram æðir skólaárið og apríl rúmlega hálfnaður, veðrið minnir okkur þó kannski ekki á að sumarið sé handan við hornið en við skulum vona að nú fari að vora hjá okkur. Í vikunni fengu nemendur í 8.-10. starfakynningu á námi og störfum slökkviliðsfólks en kynningin var hluti af valgreininni starfakynningar. Höfðaskóli er einnig kominn í samstarfsverkefni á vegum Háskóla Íslands sem nefnist ,,Stækkaðu framtíðina" en verkefnið tengir fólk af vinnumarkaði við skólastofur landsins til að segja nemendum frá starfi sínu og menntun. Þannig víkkar sjóndeildarhringur nemenda og öll ungmenni á Íslandi fá tækifæri til að eiga fyrirmynd. Við höldum því áfram með starfakynningar næsta skólaár en verkefnið verður bundin valgrein hjá öllum nemendum í 8.-10. bekk. Nánar um verkefnið hér. Í byrjun maí munu liggja fyrir upplýsingar um hvaða valgreinar verða í boði á næsta skólaári og nemendur fá að velja, nánar um það síðar. Í gær var íþróttadagur yngsta stigs hjá okkur sem gekk vonum framar. Það var ekki annað að sjá en að nemendur hafi haft gaman af. Myndir frá deginum hér. Á þriðjudaginn í næstu viku fara unglingarnir á valgreinadag inn á Blönduós en æsta vika verður svo stutt í annan endan hjá okkur þar sem sumardagurinn fyrsti er á fimmtudag og skipulagsdagur á föstudag sem starfsfólk hefur unnið af sér. Það fá því allir langt helgarfrí þá helgina. Að lokum minnum við ykkur á að vera endilega í sambandi við okkur ef þið hafið einhverjar spurningar eða vangaveltur um skólastarfið og eins eru öll velkomin í kaffi til okkar, það er alltaf gaman að fá gesti. Við vonum að þið njótið helgarinnar Með góðum kveðjum Sara Diljá og Guðrún Elsa