Fréttir

Heil og sæl Vikan sem nú er að líða var heldur betur skemmtileg í Höfðaskóla. Á mánudaginn kom skólahópur leikskólans í heimsókn til okkar en fréttir og myndir frá því má sjá hér. Á mánudaginn var einnig nemendaþing haldið í skólanum þar sem stjórnendateymi skólans hitti nemendur á öllum stigum og rædd voru ýmis mál. Það var margt áhugavert sem kom fram um atriði sem nemendur vildu ýmist bæta eða voru ánægðir með. Allt eru þetta hlutir sem við tökum til skoðunar og bregðumst við ef þurfa þykir. Það skiptir okkur miklu máli að hlusta á raddir nemenda. Þriðjudag, miðvikudag og fimmtudag voru svo stigsskemmtanir sem heppnuðust mjög vel. Frétt og myndir frá því má sjá hér. Skólablaðið Höfðafréttir er í þann mund að verða tilbúið til birtingar og verður vonandi gefið út í næstu viku. Að þessu sinni verður blaðið rafrænt og við hlökkum til að sýna ykkur afrakstur vinnunnar hjá valgreinahópnum sem að blaðinu stendur. Tíminn æðir áfram og desember er handan við hornið. 1. desember er á föstudaginn í næstu viku en þann dag ætla allir bekkir að gera eitthvað í tengslum við þann merka dag, fullveldisdaginn. Við vonum að þið njótið helgarinnar Með góðum kveðjum Sara Diljá og Guðrún Elsa

Í þessari viku var mikið um að vera hjá okkur þegar skemmtanir voru haldnar á öllum stigum. Á þriðjudaginn hittust nemendur í 1.-3. bekk ásamt fjölskyldumeðlimum og skreyttu piparkökur, gerðu jólakort, máluðu jólastjörnur og gæddu sér á veitingum sem foreldrar lögðu til. Notaleg á skemmtileg stund. Á miðviku- og fimmtudag voru svo skemmtanir hjá 4.-10. bekk þar sem þau stigu á stokk með ýmis atriði og leiki og enduðu svo í Pálínuboði með sínum fjölskyldum. Allt var þetta mjög vel heppnað og mæting góð. Við þökkum öllum sem komu og áttu skemmtilegar stundir með okkur kærlega fyrir komuna. Myndir má sjá hér.

Skólahópur leikskólans Barnabóls kemur í heimsókn til okkar einu sinni í viku. Í síðustu viku komu nemendur leikskólans á þeim tíma sem myndmennt er kennd og fengu að taka þátt, mikið fjör og mjög gaman.

Heil og sæl Vikan í Höfðaskóla gekk vel, veðrið var gott og margt um að vera. Á mánudaginn vann starfsfólk skólans frameftir þar sem þau sátu námskeið um kynferðisofbeldi og kynferðislega hegðun barna og unglinga. Mjög þarft námskeið fyrir öll. Á þriðjudaginn fóru nemendur í hestavali heim að Hólum með henni Höllu myndir og frétt frá því hér. Í gær fimmtudag var dagur íslenskrar tungu og þá setjum við af stað undirbúning fyrir framsagnarkeppnina okkar en nemendur í 5.-7. bekk taka þátt í henni. Þau vinna ýmis lestrartengd verkefni auk þess að æfa sig að lesa fyrir framan hóp. Við verðum svo með framsagnarkeppni eftir áramót. Í næstu viku verður nemenda þingið okkar haldið, allar nánari upplýsingar um það eru hér. Stigsskemmtanirnar okkar verða svo þriðjudag, miðvikudag og fimmtudag en umsjónarkennarar munu auglýsa þær. Við vonum að þið njótið helgarinnar Með góðum kveðjum Sara Diljá og Guðrún Elsa

Óskað er eftir aðstoðarmatráð og frístundaleiðbeinanda

Krakkarnir í hestavali fóru í heimsókn að Hólum í Hjaltadal í gær. Ómetanlegt og skemmtilegt tækifæri sem krakkarnir fengu og þökkum við Hólaskóla kærlega fyrir höfðinglegar móttökur. Hér fyrir neðan má lesa ferðasögu hópsins. Við fengum frábæra kynningu frá Deildarstjóra hestafræðideildar henni Sigríði Bjarnadóttur sem kynnti fyrir okkur hestadeildina mjög vel. Hún sýndi okkur skólann þar sem bóklegu fögin eru kennd. Þar bauð hún upp á bakkelsi og drykki ásamt glærukynningu um starfsemi skólans tengt hestafræðum. Þá kom hún Elisabeth Jansen og hitti okkur einnig og fræddi okkur um deildina. Þær fóru síðan með okkur niður í reiðhöll sem heitir Þráarhöll, hún er þeirra stærsta höll (1545 m2), og skartar hún m.a. áhorfendastúku fyrir 70 manns. Þar hittum við hann Atla Guðmundsson. Atli er þaulreyndur knapi og reiðkennari sem hefur starfað við þjálfun og kennslu til fjölda ára um allan heim. Hann hélt fyrir okkur skemmtilega sýnikennslu á 6. vetra hesti sínum í Þráarhöll. Eftir það fórum við og fengum að skoða Brúnastaði sem er stærsta hesthús landsins. Í húsinu eru 189 eins hests stíur. Húsið er fyrst og fremst nýtt undir nemendahesta og hesta í eigu skólans, skólahestana. Í suðurenda Brúnastaða er 800 fermetra reiðhöll, Brúnastaðahöllin. Það var ótrúlega gaman að fá þessa flottu og metnaðarfullu kynningu frá þeim Sigríði, Elisabeth og Atla. 8. desember verður Aðventusýning í Þráarhöll sem allir eru velkomnir á, hvetjum ykkur til að mæta heim að Hólum og sjá þeirra flotta starf. Þessi sýning verður auglýst nánar á síðu skólans líka á facebook hjá þeim https://www.facebook.com/Holaskoli Myndir úr heimsókninni hér

Foreldrafélag Höfðaskóla styrkti skólabókasafnið um 100.000kr til bókakaupa. Í dag tóku nemendur á móti gjöfinni ásamt Söndru bókaverði. Við þökkum foreldrafélaginu kærlega fyrir rausnarlega gjöf sem mun nýtast nemendum skólans mjög vel.

Heil og sæl Vikan var svo sannarlega stutt hjá okkur, aðeins tveir skóladagar eftir gott vetrarfrí. Í gær gengum við mílu umburðarlyndis en myndir og frétt frá því má sjá hér. Það er ýmislegt framundan hjá okkur í nóvember áður en jólagleðin tekur við í desember. Dagur íslenskrar tungu er í næstu viku og þá setjum við undirbúning fyrir framsagnarkeppnina okkar af stað, þá eru stigsskemmtanir og list- og verkgreina vika unglingastigs einnig í nóvember. Í næstu viku ætla nemendur í hestavali að fara í heimsókn að Hólum með Höllu Maríu. Í Höfðaskóla er margt skemmtilegt um að vera og við hvetjum ykkur til að kíkja við hjá okkur ef þið viljið fræðast um starfið okkar eða sjá hvað nemendur eru að kljást við. Skólinn er hjartað í samfélaginu og við eigum að standa sameiginlega vörð um hann og hafa umræðu um skólamál jákvæða og uppbyggilega. Við vonum að þið njótið helgarinnar Með góðum kveðjum Sara Diljá og Guðrún Elsa

Í dag gengur nemendur og starfsfólk skólans ásamt nokkrum góðum gestum eina mílu í tilefni af degi umburðarlyndis. Leiðtogi göngunnar í ár var Sæþór Daði Guðmundsson sem fór fyrir hópnum. Kalt var í veðri en gangan gekk engu að síður vel og nutu allir útiverunnar. Við þökkum þeim sem slóust í för með okkur kærlega fyrir gönguferðina, það skiptir okkur miklu máli þegar samfélagið tekur þátt í viðburðum sem skólinn stendur fyrir. Við vonum að gönguferðin ,,míla umburðarlyndis" sé komin til að vera á degi umburðarlyndis ár hvert.

Heil og sæl Vikan í Höfðaskóla flaug áfram, veðrið var stillt og kalt og nemendur nutu þess að vera úti. 9. og 10. bekkur fór ásamt Elvu umsjónarkennara í heimsókn í MA og VMA þar sem þau kynntust námsframboði og skoðuðu heimavistina. Það var ekki annað að heyra en að nemendur hafi verið sáttir og voru þau til mikillar fyrirmyndar í þessari ferð. Skáld í skólum heimsóttu nemendur í 5.-7. bekk en sjá má frétt og myndir frá þeirri heimsókn hér. Nemendur í 1.-3. bekk máluðu sig í tilefni af hrekkjavöku og voru ýmsar furðuverur á sveimi um skólann þann dag. Myndir hér. Þó veðrið sé gott er myrkrið svart og alltof algengt er að bæði fullorðnir og börn séu án endurskinsmerkja. Við biðlum kæru foreldrar, að vera fyrirmyndir, ganga með endurskinsmerki og gæta þess vel að börnin sjáist í myrkrinu, að fatnaður sé með endurskini að framan og aftan og ekki má gleyma að setja merki á töskur barnanna líka. Í leiðinni skulum við öll sem samfélag taka okkur saman og gæta að umferðarhraða, skafa rúðurnar vel þegar frostið bítur á þær og virða það að stöðva fyrir gangandi vegfarendum. Nú er framundan vetrarfrí í Höfðaskóla mánu-, þriðju- og miðvikudag og kennsla hefst aftur fimmtudaginn 9. nóvember. Þann dag ætlum við að halda upp á dag umburðarlyndis, fræðast og ganga saman eina mílu sem fengið hefur titilinn míla umburðarlyndis. Öll sem vilja labba með okkur eru velkomin en farið verður frá Höfðaskóla kl. 10:00. 9. 10. og 13. nóvember verður kennaranemi í heimsókn hjá okkur en foreldrar/forráðamenn hafa fengið upplýsingar um það í tölvupósti. Við vonum að þið njótið þess einkar vel að vera í vetrarfríi Með góðum kveðjum Sara Diljá og Guðrún Elsa Með góðri kveðju