Fréttir

Ein af valgreinum nemenda á mið- og unglingastigi felst í því að aðstoða í frístund skólans. Þessi mynd var tekin fyrir helgi og má þar sjá eldri nemendur í bland við þau yngir í leiknum Hver er undir teppinu.

Sæl og blessuð Vikan gekk vel í Höfðaskóla og margt skemmtilegt um að vera eins og vanalega. Lögreglumenn frá LRH komu í heimsóttu alla nemendur skólans og rithöfundurinn Gunnar Helgason hitti nemendur 6. og 7.bekkkjar gegnum teams og átti við þau gott samtal, við þökkum þessum gestum okkar kærlega fyrir að gefa sér tíma til að hitta nemendurna. Aðalfundur foreldrafélagsins var haldinn í vikunni og þegar komin er niðurstaða varðandi stjórnarskipan mun það birtast hér á heimasíðunni. Foreldrafélagið er með emailið foreldrafelag@hofdaskoli.is ef þið viljið koma t.d. sniðugum hugmyndum á framfæri eða langar að fá að starfa náið með félaginu án þess að sitja í stjórn. Miðvikudaginn 20.sept verður skipulagsdagur/viðtalsdagur og ættu allir foreldrar/forráðamenn að hafa fengið aðgang að Mentor til að geta skráð sig og barnið sitt í viðtal hjá umsjónarkennara. Við minnum á að fylgjast vel með á heimasíðunni okkar en þar setjum við inn allar helstu fréttir. Við vonum að þið njótið helgarinnar. Með góðum kveðjum Guðrún Elsa og Sara Diljá

Mánudaginn 11. september fengum við góða heimsókn þegar tveir lögreglumenn frá LHR komu í heimsókn. Þeir hittu nemendur á öllum stigum og fóru yfir hin ýmsu málefni. Nemendur höfðu mjög gaman af þessari heimsókn og þökkum við þeim Magnúsi og Unnari kærlega fyrir komuna.

Nemendur á miðstigi fóru í fjöruferð að Hrafná í gær 14. september í tilefni af því að dagur íslenskrar náttúru er núna á laugardaginn, 16. september. Ýmislegt var skoðað bæði á leiðinni og við Hrafná. Meðal annars spreyttu nemendur sig á að ýla með melgresisstráum sem voru víða á leið þeirra, skoða ýmsar gerðir af þara, handleika hrúðurkarla, bláskeljar og kuðunga. Mesta lukku vöktu þó marflærnar sem nægt var af undir steinum í fjöruborðinu. Nærumhverfið okkar er frábær kennslustaður og nálægðin við fjöruna og hafið gefur ýmis tækifæri til náms sem auðveldara er að leysa úti frekar en að skoða myndir inni í skólastofu.

Fimmtudaginn 14. september fengu nemendur í 6. og 7. bekk góða heimsókn. Gunnar Helgason rithöfundur hitti krakkana í gegnum fjarfundabúnað og sagði þeim frá ýmsu er tengist rithöfundastarfi sínu. Hann upplýsti hver væri uppáhaldsbókin sín en það er Jón Oddur og Jón Bjarni sem kom út fyrir 50 árum en það væri vegna þess að hann samsvaraði sig við aðalpersónurnar, enda tvíburi sjálfur. Hann gaf krökkunum góð ráð hvernig bæta mætti ritunarverkefni sín og sagði að best væri að bíða eftir að hugmyndirnar kæmu til manns, frekar en að hugsa stíft um þær. Að lokum las hann stórskemmtilegan bút úr óútkominni bók í seríunni um Alexander Daníel Hermann Dawidsson en sú bók heitir Bannað að drepa. Það er bæði skemmtilegt og mikilvægt fyrir krakka að fá að spjalla við rithöfunda, því þannig tengjast þeir meira bókunum og fá jafnvel meiri áhuga á að lesa. Við þökkum Gunnari kærlega fyrir að gefa sér tíma til að hitta krakkana, því hann er mjög upptekinn þessa dagana við að æfa nýtt leikrit, ásamt því að skrifa bækur.

Aðalfundur foreldrafélagsins verður haldinn á kaffistofu starfsmanna á 2.hæð í Höfðaskóla fimmtudaginn 14.sept. kl. 17:00. Farið verður yfir störf nýliðins skólaárs og línur lagðar fyrir nýhafið skólaár. Þá verður kosin stjórn félagsins. Allir áhugasamir foreldrar/forráðamenn nemenda við skólann eru hvattir til að mæta.

Í vetur ætla nemendur í 6. og 7. bekk að vera með í verkefninu Mílan sem er verkefni að skoskri fyrirmynd The daily mile. Um 5000 skólar viðsvegar um heiminn eru þátttakendur í verkefninu. Tvisvar í viku munu nemendur 6.og 7.bekkjar ganga mílu (1,6 km) um bæinn og skoða hitt og þetta. Við þiggjum hugmyndir af skemmtilegum gönguleiðum og fróðleik og erum við til í það ef einhverjir vilja slást í för með okkur. Á mánudögum fer 7.bekkur út frá kl. 8:25- 8:50 og 6. bekkur frá kl. 9:00- 9:25 Á föstudögum fer 6.bekkur út frá kl. 08:25 - 08:50 og 7.bekkur frá kl. 9:00-9:25. Í síðustu göngu gekk 7. bekkur að Einbúanum og lásum þar á skilti með fróðleik um gamla kaupfélagið. Nemendur 6. bekkjar gengu út að gömlu slökkviliðsstöð og var smá spjall þar ásamt því að við skoðuðum myndir af gömlu slökkvistöðinni í snjalltækjum. Öll erum við sammála um að þetta sé skemmtilegir og góðir göngutúrar sem búið er að fara í.

Heil og sæl Vikan hefur gengið vel og margt verið brallað. Nemendur eru allir að komast í góða rútínu eftir sumarfrí og margt spennandi framundan. 4. og. 5. bekkur fór í heimsókn í Árnes í vikunni og unnu verkefni því tengdu. Mörg skemmtileg verkefni í öllum bekkjum skólans eru nú í vinnslu og við minnum á að foreldrar/forráðamenn eru alltaf velkomnir í heimsókn, ef þeir vilja koma við og sjá það sem nemendur eru að fást við hverju sinni. Í næstu viku fáum við heimsókn frá Lögreglumönnum á vegum LHR. Þeir ætla koma með starfakynningu til unglinganna og nota tækifærið og hitta yngsta- og miðstig með smá fræðslu. Þá ætla nemendur í 9. og 10. bekk að hittast ásamt foreldrum/forráðamönnum, umsjónarkennara og skólastýrum og ræða fyrirkomulag útskriftaferða. Nú ætla margir upp um fjöll og firnindi um helgina að elta sauðfé, við vonum að þeir sem í það fara hafi gaman af og fari gætilega. Við vonum að þið njótið helgarinnar Með góðum kveðjum Sara Diljá og Guðrún Elsa

Nemendur á miðstigi eru í list og verkgreinum og er einn hópurinn að læra bútasaum.

Nemendur 1. bekkjar voru að æfa sig að flokka og telja. Lásum bókina Töluboxið hennar ömmu. Í Töluboxinu hennar ömmu er fjallað um flokkun. Með áhugaverðum og skemmtilegum söguþræði er leitast við að draga börnin inn í söguna og þar með einnig inn í stærðfræðina. Bókin Töluboxið hennar ömmu sýnir fram á hvernig hægt er að nota stærðfræði í hversdagslegum aðstæðum auk þess að auka lestrarfærni. Við vorum síðan með fullt box af tölum sem var síðan hellt á gólfið og krakkarnir flokkuðu tölurnar eftir litum og töldu síðan hvað voru margar tölur af hverjum lit.