Fréttir

Sæl og blessuð Vikan í Höfðaskóla gekk vel. Yngsta stig var með haustfund fyrir foreldra s.l. miðvikudag og nemendur á yngsta stigi sáu leikritið Krakkarnir í hverfinu á mánudaginn var. Krakkarnir í hverfinu er leikþáttur þar sem brúður eru notaðar til að fræða börnin um ofbeldi og mikilvægi þess að börn segi frá. Brúðurnar ræða saman um það sem þær hafa lent í. Jóhanna segir frá því hvernig kærasti mömmu hennar snerti hana á óviðeigandi hátt og hvaða hjálp hún fékk eftir að hún sagði frá. Stefán segir vini sínum frá því hvernig mamma Stefáns beitti hann ofbeldi og hvernig þau fengu bæði hjálp eftir að hann sagði kennaranum sínum frá. Í næstu viku fáum við fræðsluheimsókn frá Samtökunum 78 en þau ætla að koma með fræðslu inn á öll stig, hitta svo starfsfólk skólans og að lokum foreldra á fræðslufundi kl. 17:00. Foreldrafundurinn fer fram í stofum unglingastigs í Höfðaskóla. Það er mjög mikilvægt að sem flestir mæti. Fordómar byggjast oft og tíðum á skilnings- eða þekkingarleysi og er mikilvægt fyrir okkur sem samfélag að vera meðvituð og reyna eftir fremsta megni að uppræta fordóma. Ef einhverjir utanaðkomandi, aðrir en foreldrar vilja mæta, t.d. ömmur, afar, frænkur, frændur eða aðrir skólavinir er það að sjálfsögðu velkomið. Að öðru leyti gengur lífið sinn vanagang hjá okkur :) Við vonum að þið njótið helgarinnar Með góðum kveðjum Sara Diljá og Guðrún Elsa

Clotilde er grafískur hönnuður frá Frakklandi og hefur dvalið hér í 2 mánuði í Nes listamiðstöð. Hún bauð krökkunum í myndmennt yfir í stúdíó Nes og var með stutta kynningu á því hvað það er að vera grafískur hönnuður og hvernig logo eru hönnuð. Krakkarnir fengu síðan að hanna sín eigin form og raða þeim saman á mismunandi vegu og átti það að tákna hinar ýmsu tilfinningar. Þau bjuggu til sitt eigið tungumál úr allskyns formum sem þau klipptu sjálf út og límdu síðan á blað. Þau fengu að sjá dæmi um nokkur abstrakt listaverk og Clotilde útskýrði fyrir þeim hvernig listamaðurinn býr til sitt eigið tungumál úr mismunandi formum og litum. Krakkarnir fengu líka að skoða nokkrar vinnustöðvar hjá öðrum listamönnum sem eru með aðstöðu í Nes núna. Þau voru öll til fyrirmyndar og sýndu þessu mikinn áhuga. Við þökkum Nes listamiðstöð fyrir höfðinglega móttökur.

Á mánudaginn í næstu viku fáum við fræðsluheimsókn frá Samtökunum 78 en þau ætla að koma með fræðslu inn á öll stig, hitta svo starfsfólk skólans og að lokum foreldra á fræðslufundi kl. 17:00. Foreldrafundurinn fer fram í stofum unglingastigs í Höfðaskóla. Það er mjög mikilvægt að sem flestir mæti. Fordómar byggjast oft og tíðum á skilnings- eða þekkingarleysi og er mikilvægt fyrir okkur sem samfélag að vera meðvituð og reyna eftir fremsta megni að uppræta fordóma. Ef einhverjir utanaðkomandi, aðrir en foreldrar vilja mæta, t.d. ömmur, afar, frænkur, frændur eða aðrir skólavinir er það að sjálfsögðu velkomið.

Nemendur á unglingastigi hafa verið að læra um mismunandi lífverur, frumustarfsemi og líffærakerfi s.l. tvær vikur. Í dag var verklegur tími þar sem nemendur skoðuðu brjóstholslíffæri úr lömbum sem okkur áskotnaðist. Farið var yfir starfsemi nýrna, lifrar, hjarta og lungna. Þessi líffæri voru skoðuð, skorin í sundur og nemendur veltu fyrir sér ýmsum eiginleikum hvers og eins líffæris. Þá var prófað að blása í lungun til að sjá þau þenjast út og barkinn svo skoðaður nánar með því að taka hann í sundur. Nemendur urðu margs vísari eftir daginn. Við þökkum bændunum á Breiðavaði fyrir aðstoðina við þetta verkefni.

Heil og sæl Vikan í Höfðaskóla gekk vel. Í gær fór unglingastig inn á Blönduós og sá sýninguna Vloggið og í dag halda þau aftur þangað og taka þátt í valgreinadegi með nemendum úr Blöndu- og Húnavallaskóla. Í næstu viku fer 7. bekkur í Reykjaskóla og mun dvelja þar í skólabúðum alla vikuna. Judith Maria hætti störfum í frístund í vikunni og þökkum við henni kærlega fyrir gott samstarf. Í frístund koma í staðin þær Ástrós Villa og Kristbjörg Dúfa ásamt Ernu Ósk sem verður áfram á sínum stað. Nú förum við að huga að undirbúning fyrir árshátíð sem fyrirhuguð er 18. nóvember og virðist allt benda til þess að hægt verði að halda hana með hefðbundnu sniði sem er gleðilegt. Það verður allt saman auglýst betur þegar nær dregur. Við minnum aftur á mikilvægi þess að yfirfara endurskinsmerkin þar sem er orðið ansi dimmt á morgnanna þegar við mætum í skólann. Hafragrauturinn góði er svo alltaf á sínum stað á morgnanna :) Við vonum að þið njótið helgarinnar Með góðum kveðjum Sara Diljá og Guðrún Elsa

Þjóðleikhúsið lagði af stað í leikferð um landið með sýningu fyrir unga fólkið. Að þessu sinni er það sýningin Vloggið eftir Matthías Tryggva Haraldsson. Leikritið Vloggið er spennandi hugleiðing um vináttu, misgóðar forvarnir og myndbandsveituna Youtube. Þar eru Konráð og Sýrri að flytja alheiminum mikilvæg skilaboð í von um að verða heimsfræg, eða allavegana að geta bjargað einhverjum unglingi á Austfjörðum. En kannski snýst þetta, ómeðvitað, meira um að fá viðurkenningu frá hinum krökkunum í skólanum. Nemendur á unglingastigi Höfðaskóla fóru á Blönduós í morgun og sáu sýninguna í Félagsheimilinu ásamt unglingum frá Blönduósi og Húnavöllum.

Heil og sæl Vikan í Höfðaskóla gekk vel þrátt fyrir að vetur konungur hafi minnt aðeins á sig í upphafi vikunnar. Skólaráð kom saman til fundar s.l. miðvikudag og fór yfir starfsáætlun skólaársins sem samþykkt var samhljóð. Starfsáætlunin verður borin undir fræðslunefnd til samþykktar í næstu viku og birt hér á heimasíðunni eftir það. N.k. miðvikudag, 6. október lýkur kennslu kl. 11:30 hjá nemendum v. námskeiðs kennara, nemendur fara þá í mat og heim að honum loknum. Frístund tekur við þeim nemendum sem þar eru skráðir eftir hádegismatinn og verður með hefðbundnu sniði til 16:00. Að öðru leyti gengur lífið sinn vanagang, við minnum á að mánudaginn 11. október er starfsdagur í skólanum og engin kennsla þann dag. Við vonum að þið njótið helgarinnar Með góðum kveðjum Sara Diljá og Guðrún Elsa

Sæl og blessuð kæru foreldrar/forráðamenn Lítið er að frétta úr skólastarfinu um þessar mundir, lífið gengur sinn vanagang og allir hressir og kátir. Kennarar eru í óða önn að ljúka við að færa inn niðurstöður úr Lesfimi og verða þær sendar heim með nemendum í næstu viku. Niðurstöður verða einnig aðgengilegar á Mentor. Minnum á hollt og staðgott nesti. Mjólk er í boði skólans og eins ávextir alla miðvikudaga. Haustið hefur aðeins verið að minna á sig undanfarna daga og því er gott að nemendur séu með klæðnað til útivistar. Við vonum að þið njótið helgarinnar Með góðum kveðjum Guðrún Elsa og Sara Diljá