Næsta skólaár
18.02.2021
Við Höfðaskóla eru lausar kennarastöður fyrir næsta skólaár. Um getur verið að ræða almenna kennslu.
Nánari upplýsingar um störfin veitir skólastjóri, Sara Diljá Hjálmarsdóttir í síma 452-2800
Lesa meira
Fréttir
Eldvarnargetraun landssambands slökkviliðsmanna
18.02.2021
Landssamband slökkviliðsmanna stóð fyrir eldvarnargetraun á meðal þriðjubekkinga á landinu öllu. Foreldrar fengu upplýsingar heim í nóvember þar sem þeir voru hvattir til þess að taka þátt með börnum sínum. Dregið var úr réttum svörum á landsvísu og á meðal sigurvegara á landsvísu var Arnar Gísli nemandi í 3.bekk Höfðaskóla.
Hafsteinn Pálsson slökkviliðsstjóri á Skagaströnd kom í heimsókn og veitti Arnari Gísla viðurkenningu og gjafabréf frá Spilavinum ásamt því að færa öllum nemendum 3.bekkar ýmsar skemmtilegar gjafir t.d. endurskinsmerki og vasaljós. Þökkum við honum kærlega fyrir komuna.
Lesa meira
Öskudagur
17.02.2021
Allskonar kynlegir kvistir mættu í skólann í morgun, hugmyndaríki, gleði og glaumur einkenndu morguninn hér í skólanum.
Lesa meira
Heimsmarkmið Sameinuðu þjóðanna
17.02.2021
Þann 5.febrúar sl. hófust þættir á RÚV sem bera heitið HM 30 og er sýndur einn þáttur vikulega. Í þáttunum fara tveir þáttastjórnendur yfir heimsmarkmið Sameinuðu þjóðanna og vill svo skemmtilega til að annar þeirra er nemandi Höfðaskóla, Steinunn Kristín Valtýsdóttir. Það verður spennandi að fylgjast með þessum fróðlegu þáttum.
Lesa meira
Frá eggi að unga
17.02.2021
Nemendur í 4.-7. bekk eru að vinna hörðum höndum að því að fjölga nemendum skólans, eftir ca 18-20 daga ættu að bætast í hópinn 7 litlir hænuungar. Krakkarnir tengja þetta að sjálfsögðu við hæfniviðmið Aðalnámskrár grunnskóla og vinna skemmtilega verkefnavinnu tengda ferlinu frá eggi að unga.
Lesa meira
Föstudagskveðja
12.02.2021
Sæl kæru skólavinir
Vikan í Höfðaskóla gekk ljómandi vel. Lífið gengur sinn vanagang hjá okkur og framundan er margt spennandi.
Á mánudaginn er bolludagur og þá mega nemendur að sjálfsögðu koma með bollur í nesti. Á miðvikudaginn er svo öskudagur og þá verður ýmislegt um að vera. Nemendum á yngsta stigi stendur til boða að fara með frístund að syngja og safna sælgæti eða öðrum varningi. Við höfum óskað eftir því að fyrirtæki sem eru tilbúin til að taka á móti krökkunum láti okkur vita og munum við svo láta nemendur á mið- og unglingastigi vita hvaða fyrirtæki það eru.
Foreldrafélag Höfðaskóla mun svo standa fyrir öskudagsskemmtun fyrir nemendur sem verður nánar auglýst þegar skipulag liggur fyrir.
Á starfsmannafundi í vikunni voru ýmsar ákvarðanir teknar:
Danskennsla verður vikuna 15.-19. mars. Kennari verður Ingunn M. Hallgrímsdóttir. Öll stig fara í 60 mínútna danstíma á dag.
List- og verkgreinavika verður á unglingastigi 22.-26. mars og munu foreldrar/forráðamenn nemenda þar fá upplýsingar þegar nær dregur.
Miðvikudaginn 7. apríl og fimmtudaginn 8. apríl munu nemendur í 9. og 10. bekk fara á námskeið í skyndihjálp og endurlífgun og sömuleiðis mun starfsfólk fara á námskeið. Karl Lúðvíksson sér um skipulag þess og kennslu.
Árshátíðin verður haldin föstudaginn 9. apríl. Nánari útfærsla á henni verður auglýst þegar nær dregur.
Semsagt, margt spennandi og skemmtilegt framundan :)
Stöndum saman um að efla góð samskipti og samvinnu og gera þannig skólasamfélagið okkar enn betra.
Lesa meira
112 dagurinn
11.02.2021
Hinn árlegi 112 dagur var haldinn hátíðlegur í dag. Markmið dagsins er að kynna neyðarnúmerið 112 og starfsemi aðilanna sem tengjast því, efla vitund fólks um mikilvægi þessarar starfsemi og hvernig hún nýtist almenningi. Markmið dagsins er enn fremur að efla samstöðu og samkennd þeirra sem starfa að forvörnum, björgun og almannavörnum og undirstrika mikilvægi samstarfs þeirra og samhæfingar.
Viðbragðsaðilar hér á Skagaströnd:
- Björgunarsveitin Strönd
- Lögreglan
- Slökkviliðið
- Rauði krossinn
Mættu á bílastæðið við íþróttahúsið með allan sinn bíla- og tækjaflota og leyfðu nemendum skólans berja græjurnar augum.
Þökkum við þeim kærlega fyrir komuna.
Lesa meira
Unglingar í forritunarvali heimsóttu yngsta stig
11.02.2021
Nemendur á unglingastigi í forritunarvali fóru á yngasta stigið í morgun og kynntu forritanlegu kúluna Sphero fyrir krökkunum. Krakkarnir höfðu mjög gaman af þessari heimsókn.
Lesa meira
Skólalóðin
09.02.2021
Nemendur á miðstigi eru ekkert að láta "smá" hálku á körfuboltavellinum stoppa sig og yngri krakkarnir eru himinsæl með snjóinn sem var mokaður í fjall á skólalóðinni.
Lesa meira
Föstudagskveðja
05.02.2021
Heil og sæl
Vikan í Höfðaskóla gekk vel og nemendur unnu við ýmis verkefni. Veðrið hefur verið gott og fóru nemendur og starfsfólk í frístund m.a. upp á tjaldsvæði á mánudaginn og nutu þess að vera úti.
Við erum farin að huga að árshátíð og verður nánari útfærsla á henni kynnt þegar skipulag liggur fyrir. Ljóst er að árshátíðin verður rafræn þetta skólaárið en dagsetning hefur ekki enn verið ákveðin.
Í lok síðasta skólaárs áttu nemendur skólans að fá danskennslu sem féll niður vegna þeirra takmarkana sem þá voru í gildi v. covid. Nú horfir svo við að hægt sé að hafa danskennsluna í mars og höfum við lagt undir vikuna 15.-19. mars. Nánara skipulag verður kynnt þegar það liggur fyrir.
Foreldrakönnun skólapúlsins hefur verið send út og hvetjum við foreldra til að taka þátt. Skólinn þarf að ná 80% svarhlutfalli svo könnunin teljist marktæk og eins og staðan er núna er svarhlutfall aðeins 35%.
Við minnum á mikilvægi þess að hafa ætíð í huga að jákvæður skólabragur er sameiginleg ábyrgð nemenda, foreldra/forráðamanna og starfsfólks. Nemendur, foreldrar og starfsfólk sýna hvert öðru kurteisi og virðingu.
Annars gengur lífið sinn vanagang hjá okkur og við hvetjum ykkur áfram til að vera dugleg að skoða heimasíðuna okkar, þar setjum við reglulega inn fréttir og myndir.
Við vonum að þið njótið helgarinnar
Með góðum kveðjum
Sara Diljá og Guðrún Elsa
Lesa meira