Fréttir

Heil og sæl Vikan í Höfðaskóla gekk vel og óhætt að segja að nemendur séu að standa sig með ágætum í þeim takmörkunum sem nú eru í gildi. Örlitlir hnökrar komu upp í hádegismatnum í Fellsborg þar sem nemendur fóru ekki alveg eftir settum reglum en því var kippt í liðinn og hefur gengið betur síðan. Skólahald verður með sama hætti og í þessari viku á mánudag og þriðjudag. Von er á reglugerð um áframhaldandi takmarkanir sem gilda frá miðvikudeginum 18. nóvember. Þegar sú reglugerð liggur fyrir munum við upplýsa ykkur um skipulagið hjá okkur frá og með þeim degi. Við finnum fyrir því að nemendur eru orðnir þreyttir á þessu ástandi og er það vel skiljanlegt. Þetta ástand hefur verið langvarandi og ýmsar takmarkanir hafa verið settar sem hafa haft áhrif á börnin. Við í skólanum erum að skoða hvernig við getum brugðist við þessari þreytu sem farin er að myndast og hvetjum við foreldra og forráðamenn einnig til að vera meðvitaða og gera eitthvað skemmtilegt með börnunum sínum. Barnaheill stendur t.d. fyrir símalausum sunnudegi, n.k. sunnudag þann 15. nóvember og hvetjum við alla til að taka þátt. Upplýsingar um þennan dag má sjá hér. Árshátíðin okkar hefði samkvæmt skóladagatali átt að vera 19. nóvember, fimmtudaginn í næstu viku. Eins og áður hefur verið upplýst um var henni frestað og verður staðan endurmetin í febrúar. Kennarar munu þó gera eitthvað skemmtilegt með nemendum þennan dag og brjóta upp hefðbundna kennslu að minnska kosti part úr degi :) Umsjónarkennarar hvers stigs senda upplýsingar um það heim. Að öðru leyti höldum við okkar striki, tökum einn dag í einu og vonum að skólahald verði orðið með hefðbundnum hætti sem allra fyrst. Til þess að það verði þurfum við öll að standa saman og muna að við erum öll almannavarnir. Við vonum að þið njótið helgarinnar Með góðum kveðjum Sara Diljá og Guðrún Elsa

Heil og sæl Þessi vika er stutt í annan endan þar sem við erum með vetrarfrí á morgun og á mánudag. Vikan gekk vel hjá okkur og margt spennandi í gangi. Eins og hefur eflaust ekki farið framhjá neinum stendur til að herða sóttvarnaraðgerðir en við höfum ekki enn fengið fréttir af því hvort og þá hvernig þær munu hafa áhrif á skólastarf. Við höldum ykkur upplýstum ef breytingar verða. Nemendur á yngsta stigi fengu í vikunni endurskinsmerki í gjöf en þau voru að ljúka við umferðarþema. Endurskinsmerki eru nauðsynleg þegar dimmt er úti og hvetjum við foreldra á öllum stigum að yfirfara flíkur og töskur barnanna sinna og gæta þess að allir sjáist vel í myrkrinu. Við vonum að þið njótið vetrarfrísins Með góðum kveðjum Sara Diljá og Guðrún Elsa

Þessa dagana eru nemendur skólans að rifja upp umhverfissáttmálann okkar sem við settum á síðasta skólaári. Gott væri ef foreldrar mynd kíkja yfir stefnuna líka og ræða hana við börnin.

Heil og sæl Vikan í Höfðaskóla gekk vel. Við héldum fyrsta fund í umhverfisnefnd og vonumst til að geta sótt um Grænfána fyrir lok þessa skólaárs. Á starfsmannafundi í þessari viku var tekin ákvörðun um að fresta árshátíð um sinn. Til stóð að halda hana 19. nóvember n.k. en í ljósi þess að núgildandi samkomutakmarkanir gilda til 16. nóvember erum við ekki bjartsýn á að ná að halda hana með hefðbundnu sniði þann 19.. Staðan verður endurmetin í febrúar og ef útlit er fyrir að ekki verði hægt að halda árshátíðina eins og við erum vön að gera munum við finna nýtt fyrirkomulag, við erum jú orðin ansi sjóuð í að breyta áætlunum okkar :) Á starfsmannafundi var einnig rætt um fyrirkomulag litlu jóla og hvaða fyrirkomulag ætti að vera á pakkaskiptunum. Við ætlum að halda okkur við að styrkja gott málefni í stað þess að skiptast á gjöfum og nú langar okkur að velja málefni sem stendur samfélaginu okkar nærri. Ákveðið var að styrkirnir færu til félagasamtaka en ekki einstaklinga. Allar ábendingar um málefni til að styrkja má senda okkur hér. Nemendur verða að sjálfsögðu hafðir með í ráðum þegar kemur að því að velja endanlega hvaða málefni verður styrkt. Næstu tvær vikur verða styttri en venjulega, þar sem við tökum okkur vetrarfrí föstudaginn 30. október og mánudaginn 2. nóvember. Að lokum minnum við ykkur á að hafa samband ef eitthvað er. Netföng allra starfsmanna eru aðgengileg hér á heimasíðunni og símanúmerið í skólanum er 452-2800. Við skulum stilla okkur saman um að tala fallega um skólann okkar og stuðla saman að jákvæðum skólabrag. Við vonum að þið njótið helgarinnar Með góðum kveðjum Sara Diljá og Guðrún Elsa