Fréttir

Heil og sæl Aftur er kominn föstudagur, tíminn líður hjá á ógnarhraða. Vikan í Höfðaskóla gekk ljómandi vel. Skólastarfið er með rólegra móti þegar kemur að vettvangsheimsóknum eða ferðalögum vegna stöðunar í samfélaginu en að öðru leyti gengur lífið sinn vanagang hjá okkur. Við reynum að vera dugleg að setja fréttir og myndir á heimasíðuna og hvetjum ykkur til að vera dugleg að fylgjast þar með. Í þessari viku má t.d. sjá myndir úr smíðakennslu á yngsta- og miðstigi, af náttúrufræði verkefnum hjá miðstigi og frá lestrarstund á yngsta stigi. Í næstu viku er stefnan að halda fyrsta fund skólaársins í umhverfisnefnd og halda áfram vinnunni í átt að því að verða skóli á grænni grein. Við vorum búin að skipuleggja viðburði í tengslum við það í vor sem við þurftum að fella niður en getum vonandi haldið þá þegar líður á þetta skólaár. Annars höldum við áfram að taka eina viku í einu og skipuleggja skólastarfið út frá ástandinu og þeim reglum sem eru í gildi hverju sinni. Að lokum skorum við á ykkur að fara yfir vetrarfötin um helgina svo allt verði klárt þegar veturkonungur skellur á af fullum þunga :) Við vonum að þið njótið helgarinnar Með góðum kveðjum Sara Diljá og Guðrún Elsa

Heil og sæl Vikan í Höfðaskóla gekk vel. Covid-19 veiran er farin aftur á flug en við höfum ekki þurft að breyta hefðbundnu skólastarfi hjá okkur. Aftur á móti mælumst við til þess að foreldrar, forráðamenn eða aðrir utanaðkomandi aðilar komi ekki að nauðsynjalausu inn í skólann. Hægt er að hringja í síma 4522800 til að fá lausn mála sinna :) Í gær tóku skólastjórar í Austur og Vestur Húnavatnssýslu sameiginlega ákvörðun um að aflýsa Reykjaskólaferð 7. bekkjar sem átti að vera 19.-23. október sem og valgreinahelgi sem stóð til að unglingarnir myndu sækja inn á Blönduós 16. og 17. október. Við þurfum að vera skynsöm, varast blöndun hópa á milli skóla og reyna þannig að halda veirunni áfram í burtu frá okkar svæði. Næstu vikur munu ákvarðast að hluta af því hvernig veiran hagar sér og hvernig samkomu- og fjöldatakmörkunum verður háttað. Við sníðum okkur stakk eftir vexti :) Að lokum minnum við á hafragrautinn góða sem er í boði alla morgna frá 7:45 og ávaxtastundina á miðvikudögum. Við vonum að þið njótið helgarinnar og munum, við erum öll almannavarnir. Með góðum kveðjum Sara Diljá og Guðrún Elsa

Í 10 gr. grunnskólalaga nr. 91/2008 kemur fram að við grunnskóla skuli starfa nemendafélag og er skólastjóri ábyrgur fyrir stofnun þess. Í dag var Nemendafélag Höfðaskóla stofnað og kosið í stjórn þess. Niðurstöðurnar voru svohljóðandi: Úr 8. bekk eru þær Elísa Bríet Björnsdóttir og Steinunn Kristín Valtýsdóttir í stjórn og Ásgeir Sigmar Björnsson varamaður Úr 9. bekk eru þau Óðinn Örn Gunnarsson og Stefanía Hrund Stefánsdóttir í stjórn og Ísabella Líf Tryggvadóttir varamaður Úr 10. bekk eru þau Gabríel Goði Tryggvason og Karen Líf Sigurbjargardóttir í stjórn og Sonja Rut Jónþórsdóttir varamaður. Formaður nemendaráðs verður kosinn á fyrsta fundi félagsins en hann mun koma úr röðum 10. bekkinga. Í stjórninni sitja einnig skólastjórnendur, Sara Diljá og Guðrún Elsa. Fyrsti fundur félagsins er fyrirhugaður síðar í mánuðinum.

Aðalfundi foreldrafélagsins frestað Vegna hertra aðgerða þríeykisins verðum við að fresta fundarhöldum til 26.októbér til að byrja með. Við munum minna á fundinn þegar nær dregur Bestu kveðjur Stjórnin

Sæl og blessuð Vikan leið hratt í Höfðaskóla og það var ýmislegt um að vera. Unglingastig fékk Bjössa rafvirkja í heimsókn og hann kenndi nemendum að búa til millistykki, lóða og nýta sítrónur og kartöflur sem orkugjafa. Nemendur í 4.bekk þreyttu samræmd könnunarpróf í íslensku og stærðfræði. Sú hefð hefur skapast hér í Höfðaskóla að nemendur fá kaffi í boði skólans að prófi loknu og í þetta sinn var boðið uppá pizzastykki, ostaslaufur og epla/appelsínusafa. Kennarar eru í óða önn að ljúka við að færa inn niðurstöður úr Lesfimi og verða þær sendar heim með nemendum í næstu viku. Niðurstöður verða einnig aðgengilegar á Mentor. Annars er lítið að frétta úr skólastarfinu um þessar mundir, lífið gengur sinn vanagang og allir hressir og kátir. Við vonum að þið njótið helgarinnar Með góðum kveðjum Guðrún Elsa og Sara Diljá