Fréttir

Nemendur í 1.og 2.bekk eru að vinna verkefni tengt sjálfsmynd sinni uppúr bókinni Halló heimur. Nemendur teiknuðu sjálfa sig og kennara sína í fullri stærð á maskínupappír. Verkefnavinna gekk vel og allir nutu sín í botn. Sjá myndir hér

Heil og sæl Vikan í Höfðaskóla gekk vel, við fengum allskonar veður en létum það ekki á okkur fá. Fyrirhuguð ferð 10. bekkjar í Borgarnes, sem átti að vera í gær, var frestað til 23. febrúar vegna veðurs. Skólahópur leikskólans kom aftur í heimsókn til okkar í gær eftir stutt hlé og munu þau koma reglulega í heimsókn fram á vor. Það er alltaf skemmtilegt að fá góða vini í heimsókn en þau ætla að prufa hinar ýmsu kennslustundir til að fá smjörþefinn af því sem koma skal í haust. Yngsta stig hélt upp á afmælið hjá Blæ, en bangsinn Blær fylgir þeim í tengslum við vináttuverkefni Barnaheilla. Afmælið var vel heppnað og skemmtu nemendur sér konunglega. Þegar veðrið er blautt er mikilvægt að klæða sig samkvæmt því og vera með auka sokka í töskunni. Við minnum einnig á hafragrautinn okkar góða, sem er í boði alla morgna sem og ávaxta stundina okkar alla miðvikudaga en þá daga þurfa nemendur ekki að hafa með sér nesti. Næsta vika er svo síðasta heila vikan okkar fyrir vetrarfrí. Við vonum að þið njótið helgarinnar Með góðum kveðjum Sara Diljá og Guðrún Elsa

Heil og sæl Vikan í Höfðaskóla hefur flogið áfram og skólastarfið gengur vel. Á mánudagskvöldið kom Þorsteinn V. Einarsson sem heldur úti samfélagsmiðlinum Karlmennskan og hélt fyrirlestur fyrir foreldra og forráðamenn. Erindið hans var virkilega áhugavert og þökkum við þeim foreldrum/forráðamönnum sem mættu kærlega fyrir komuna. Það skiptir miklu máli að foreldrar/forráðamenn séu duglegir að sækja þau erindi sem auglýst eru á vegum skólans. Á þriðjudagsmorgninum hitti hann svo nemendur 8.-10. bekkjar og var með erindi fyrir þau líka. Nemendur voru áhugasamir og höfðu gagn og gaman af. Á morgun er starfsdagur hjá Sveitarfélaginu Skagaströnd og því er hvorki kennsla né frístund þann dag. Nemendur fá því langa helgi. Í næstu viku fer 10. bekkur í heimsókn í Menntaskóla Borgarfjarðar, en þangað er þeim boðið til að kynna sér nám og starfsemi skólans. Elva umsjónarkennari þeirra ætlar að fylgja þeim þangað. Þegar blautt er úti er mjög mikilvægt að nemendur séu með auka sokka í töskunni og ekki verra ef þessi yngstu eru með auka par af buxum líka. Við vonum að þið njótið helgarinnar Með góðum kveðjum Sara Diljá og Guðrún Elsa

Leikreglur karlmennskunnar Áhersla verður á að útskýra karlmennsku út frá kynjafræðilegu sjónarhorni, muninn á skaðlegri og jákvæðri karlmennsku og hvernig hægt sé að stuðla að og temja sér jákvæða karlmennsku öllum kynjum til aukinna lífsgæða, tækifæra og jafnréttis. Fyrirlesari er Þorsteinn V. Einarsson. Hann er menntaður kennari með meistaragráðu í kynjafræði frá Háskóla Íslands. Hefur undanfarin 5 ár starfað við fræðslu og ráðgjöf í jafnréttismálum á vinnustöðum, skólum og félagsmiðstöðvum. Einnnig heldur hann utan um fræðslusamfélagsmiðilinn og hlaðvarpið Karlmennskan.

Heil og sæl kæru skólavinir Í vikunni komu Sara Diljá og Fjóla Dögg aftur til starfa eftir barneignarleyfi. Fjóla tók við umsjón í 1. og 2. bekk ásamt Berglindi Rós og Sara fór aftur inn í stjórnendateymið með Guðrúnu Elsu. Vikan var með óhefðbundnu sniði hjá okkur þar sem það var starfsdagur á þriðjudaginn og á miðvikudaginn mættu foreldrar/forráðamenn í viðtöl til umsjónarkennara barna sinna. Viðtölin voru vel sótt og þökkum við öllum kærlega fyrir komuna. Gott samstarf milli heimila og skóla skiptir miklu máli. Við minnum á að foreldrar/forráðamenn eru alltaf velkomin í heimsókn til okkar, það þarf ekki að gera boð á undan sér. Í næstu viku verður starfsdagur hjá Sveitarfélaginu Skagaströnd sem starfsfólk Höfðaskóla mun taka þátt í og því fellur skólahald og frístund niður föstudaginn 27. janúar. Við minnum á mikilvægi þess að nemendur mæti með íþróttaföt þá daga sem íþróttatímar eru á stundaskrá. Við vonum að þið njótið helgarinnar Áfram Ísland Kveðja Sara Diljá og Guðrún Elsa

Heil og sæl Vikan í Höfðaskóla gekk vel. Nemendur eru í óða önn að ljúka við námsmatsverkefni sem hefur gengið vel. Veðrið hefur verið allskonar og nú í lok vikunnar er búið að vera ansi kalt. Við klæðum okkur þá bara betur. Í næstu viku er starfsdagur á þriðjudag og því enginn skóli hjá nemendum og á miðvikudag verða svo foreldraviðtöl. Nemendur mæta því hvorki í skólann á þriðjudag né miðvikudag. Viðtölin bóka foreldrar í gegnum Mentor. Ef þær tímasetningar sem í boði eru henta alls ekki má hafa samband við umsjónarkennara í tölvupósti og fundin verður lausn á þeim málum. Á fimmtudag og föstudag verða svo hefðbundnir skóladagar og ný önn hefst. Ég vona að þið njótið helgarinnar Með góðum kveðjum Guðrún Elsa

Sæl kæru vinir og gleðilegt nýtt ár Skólastarfið fer vel af stað eftir gott jólafrí Nemendur eru í óða önn að ljúka við þau verkefni sem þurfa að klárast fyrir annarlok og kennarar á fullu í námsmatsvinnu þar sem vorönn hefst 19.janúar. Veðrið er síbreytilegt á þessum árstíma og við minnum á að mikilvægt er að nemendur komi vel klæddir í skólann. Gott er að hafa auka par af sokkum með í skólatöskunni. Að lokum minnum við á hafragrautinn góða sem Haddý töfrar fram á hverjum morgni og er í boði frá 7:45. Einnig er ávaxtastund á miðvikudögum og því ekki þörf á að koma með nesti þá daga. Ég vona að þið njótið helgarinnar Með góðum kveðjum Guðrún Elsa

Yngsta stigið sendir kveðjur góðar og sæl þau fara heim að halda jól. Úti kætast þau með kinnar rjóðar og jólasveinar komnir eru á ról. Á miðstigi er margt búið að bralla og margir orðnir spenntir fyrir því, að kveðji Ásdís, Gigga, Dúfa og Halla svo allir komist heim í jólafrí. Unglingarnir eru ekkert spenntir að Elva og Dagný sendi þá í frí. Þeir eru varla heima hjá sé lentir, er skólinn byrjar aftur, enn á ný. Við óskum ykkur gleðilegra jóla með von um að þið dragið gæfuspil. Allir starfsmenn hér í Höfðaskóla senda hlýjar kveðjur ykkar til.

Heil og sæl Vikan í Höfðaskóla gekk vel og það var margt um að vera. Snjálfur álfur hefur verið í heimsókn á yngsta stigi og tekið upp á ýmsu. Nágrannar okkar í Tónlistarskóla A-Hún komu á mánudaginn og fimmtudaginn og stýrðu söng þar sem allur skólinn tók undir. Á fimmtudaginn fengur nemendur skólans piparkökur og heitt/kalt kakó í nestistímanum. Í morgun fóru nemendur skólans ásamt starfsfólki yfir í kirkjuna og hlustuðu á jólaminningar Þorgerðar Þóru (Giggu). Nokkrir nemendur af unglingastigi stýrðu söng og aðrir nemendur skólans tóku undir af mikilli snilld. Í hádeginu var síðan boðið uppá möndlugraut sem Guðrún, Ásdís og Finnbogi hrærðu ásamt dyggu aðstoðarfólki. Ein mandla fyrir hvern bekk og var gaman að sjá nemendur gleðjast yfir því að fá möndluna sem og hina sem samglöddust með bekkjarfélögum sínum. Í dag lauk söfnuninni okkar til styrktar jólasjóðs Skagastrandar og Skagabyggðar, söfnuðust 61.500 krónur sem munu án efa koma sér vel nú fyrir jólahátíðina. Þess má geta að ein amman gaf 1000kr fyrir hvert barnabarn sem hún á í skólanum og kunnum við henni okkar bestu þakkir. Á mánudaginn verða svo litlu jólin okkar. Nemendur mæta í skólann kl. 9:00 og verða til 12:00. Allt starfsfólk verður mætt kl. 8:00 þannig að ef þannig stendur á þá er auðvitað í lagi að nemendur mæti fyrr. Við ætlum að dansa í kringum jólatré þar sem Hugrún Sif spilar undir fyrir okkur og Sóley Sif leiðir sönginn :) Engin frístund þennan dag heldur halda allir heim í jólafrí á hádegi. Frekari upplýsingar um litlu jólin munu berast foreldrum/forráðamönnum frá umsjónarkennurum. Höfðaskóli er einstaklega heppinn að eiga hæfileikaríkt og gott fólk í kringum sig sem kemur til aðstoðar við hin ýmsu tilefni. Ég vona að þið njótið helgarinnar Með góðum jólakveðjur Guðrún Elsa

Nemendafélag Höfðaskóla hélt í gærkvöldi skemmtikvöld fyrir alla nemendur á miðstigi. Farið var í Bingo og spilað Kviss. Nemendafélagið var einnig búið að útbúa sína útfærslu af þrautum sambærilegum og eru í þáttunum Kappsmál á RUV. Kvöldið heppnaðist vel og þökkum við nemendafélaginu fyrir augljósan metnað til að gera kvöldið skemmtilegt.