Fréttir

Unglingastigs nemendur sem voru í myndmenntavali eyddu síðustu tímunum í Nes listamiðstöð. Þar lærðu krakkarnir að búa til sitt eigið 'screen printing' frá grunni. Þetta var mjög áhugavert verkefni og krakkarnir fengu að kynnast því hve mikil vinna og bras felst oft í gerð listaverka. Útkoman varð allskonar og þau fögnuðu bæði því sem misheppnaðist og því sem lukkaðist. Þau prófuðu að prenta á bæði pappír og boli. Nemendurnir hafa staðið sig vel í haust og verkefnin sem þau unnu voru meðal annars: verkefni tengd listasögu, úti teikningar, æfðu sig með Posca penna, horfðu á þátt um Ólaf Elíasson listamann, unnu öll saman að einu stóru halloween þema listaverki og sitthvað fleira. Það er greinilegt að skólinn okkar á ungt og upprennandi listafólk!

Heil og sæl Vikan í Höfðaskóla gekk vel og nemendur unnu við ýmis verkefni. Veðrið hefur verið gott og hafa nemendur og starfsfólk í frístund notið þess að vera úti. Við erum farin að huga að árshátíð sem verður með hefðbundnu sniði 24.nóv og verður nánari útfærsla á henni kynnt þegar skipulag liggur fyrir. Vetrarfrí verður föstudaginn 11. nóvember, mánudaginn 14.nóvember og þriðjudaginn 15.nóvember og vonum við að veðurguðirnir verði okkur hliðhollir þessa daga. Við minnum á mikilvægi þess að hafa ætíð í huga að jákvæður skólabragur er sameiginleg ábyrgð nemenda, foreldra/forráðamanna og starfsfólks. Nemendur, foreldrar og starfsfólk sýna hvert öðru kurteisi og virðingu. Annars gengur lífið sinn vanagang hjá okkur og við hvetjum ykkur áfram til að vera dugleg að skoða heimasíðuna okkar, þar setjum við reglulega inn fréttir og myndir. Við vonum að þið njótið helgarinnar Með góðum kveðjum Starfsfólk Höfðaskóla

Nemendur í heimilisfræði vali á unglingstigi útbjuggu tvenns konar kássu með það að markimiði að læra hvernig hægt er að drýgja matarafganga á einfaldan máta. Annars vegar var útbúin saltkjötskássa úr hrossakjöt og hins vegar kjötkássa úr ósöltuðu lambakjöti. Nemendur suðu með þessu kartöflur og egg, gerðu jafning og borðuðu.

Sæl og blessuð Aftur er kominn föstudagur, tíminn líður hjá á ógnarhraða, október að klárast og einungis 57 dagar til jóla. Viðburðarík vika að baki, nemendur unglingastigs og miðstigs heimsóttu Nes listamiðstöð í myndmenntatímum og verður hægt að sjá verk þeirra á næsta opna húsi hjá listamiðstöðinni. Menntabúðirnar voru haldanar með pompi og prakt sl. miðvikudag þar sem mikill fjöldi gesta kom og kynnti sér tækninýjungar í skólastarfi. Við þökkum Nes fyrir gott samstarfs og öllum þeim sem mættu í heimsókn á miðvikudaginn. Endilega skoðið eftirfarandi auglýsingu frá foreldrafélagi Höfðaskóla, mikilvægt er fyrir skólann og starfið að vera með virkt og gott foreldrafélag. Við reynum að vera dugleg að setja fréttir og myndir á heimasíðuna og hvetjum ykkur til að vera dugleg að fylgjast þar með. Við vonum að þið njótið helgarinnar Með góðum kveðjum Starfsfólk Höfðaskóla

Kæru foreldrar, forráðamenn og aðrir velunnarar skólans. Við hér í Höfðaskóla erum himinlifandi með frábæra mætingu á menntabúðirnar sem haldnar voru í gær, stuðningur ykkar og áhugi á skólastarfinu skiptir okkur öll máli. Mikil þekking og reynsla í upplýsingatækni og tækniþróun er til staðar hjá nemendum Höfðaskóla eins og sjá mátti á þeim tæplega 40 stöðvum sem nemendur í 1.-10.bekk settu upp og í gær og fögnum við því tækifæri að geta deilt hugmyndum og reynslu með því að sýna, sjá og ræða saman. Tæknin gerir skólastarfið fjölbreyttara og þau verkfæri og þekking sem hlotnast er oft mögnuð. Undir myndunum er svo hægt að afrita slóð til að nálgast það app eða þá síðu sem verið var að kynna.

Á mánudaginn skellti valgreinin heilsa og íþróttafræði sér á Sauðárkrók á Crossfit æfingu hjá Crossfit 550. Þau fengu smá fræðslu um crossfit og gerðu síðan WOD(work of the day) dagsins. Í lokin voru teygjur og síðan máttu þau prófa tæki og æfingar í stöðinni. Upphífingar, kaðall, hringir og fleira var prófað. Við þökkum kærlega fyrir frábærar móttökur.

4.bekkur er í myndmenntahóp og eyddu þau seinustu tveimur mánudagstímunum niðrí Nes Listamiðstöð. Þar fengu krakkarnir stutta kynningu á listakonunni Yayoi Kusama sem sérhæfir sig í skrautlegum graskers skúlptúrum. Eftir kynninguna fengu krakkarnir síðan leiðsögn, frá tveimur listamönnum Nes, við að búa til sitt eigið grasker úr blöðrum og pappamassa. Þeim fannst þetta öllum mjög skemmtilegt verkefni og sýndu mikinn metnað við gerð graskeranna, sem verða svo til sýnis á opnu húsi nk. Laugardag 29.10. í Listamiðstöðinni.

Nemendur Höfðaskóla hafa undanfarin ár tekið virkan þátt í þeirri tækniþróun sem hefur átt sér stað í námi og kennslu. Miðvikudaginn 26.október milli kl. 16:00 og 18:00 verður opið hús í Höfðaskóla þar sem forráðamenn, ættingjar og aðrir velunnarar skólans eru hjartanlega velkomnir að kíkja í heimsókn og kynna sér hin ýmsu tæki og tól. Nemendur 10.bekkjar munu selja vöfflur og kaffi/djús á 500kr. Vilko styrkti nemendahópinn um vöfflurnar og þökkum við þeim vel fyrir.

Nemendur í 3. og 4. bekk voru að gera tilraun með egg. Þau hafa verið að læra um mikilvægi þess að vermda höfuðkúpuna og má líkja henni við eggjaskurn. Nemendum var skipt í 3 hópa og fékk hver hópur 3 egg og áttu að búa vel um þau eitt egg í einu. Hver hópur kynnti svo fyrir hinum hópunum hvernig þau höfðu búið um sitt egg. Hverjum hóp tókst að búa það vel um eitt eggjanna að það brotnaði ekki. Til að gera tilraunina enn meira spennandi þá voru öll egg nemandanna soðin nema eitt sem var hrátt. Allir höfðu gaman af og sáu þau með berum augum hve mikilvægt er að nota hjálm og passa upp á höfðið sitt.