Fréttir

Heil og sæl Þessi vika var í styttra lagi hjá okkur en þó var nóg um að vera. 9. og 10. bekkur voru á skyndihjálparnámskeiði á þriðjudag og miðvikudag sem gekk vel. Myndir frá því má sjá hér. Skóladagatal næsta skólaárs er nú í vinnslu og hafa drögin verið birt hér. Í næstu viku er aftur stutt vika þar sem sumardagurinn fyrsti er á fimmtudaginn og starfsdagur sem starfsfólk hefur nú unnið af sér á föstudag, það fá því allir langt helgarfrí þá. Nú er heldur betur farið að síga á seinni hlutann á skólaárinu, tíminn æðir áfram og áður en við vitum af hringjum við út í sumarfrí. Það er þó margt framundan á þeim vikum sem eftir eru, sem dæmi má nefna er skólamyndataka, list fyrir alla, danskennsla, viðburðurinn Perlað af Krafti, vorferðir nemenda og margt fleira :) Allt verður þetta auglýst þegar nær dregur hverjum viðburði fyrir sig. Við vonum að þið njótið helgarinnar Með góðum kveðjum Sara Diljá og Guðrún Elsa

Nemendur 9. og 10.bekkjar sóttu í vikunni námskeið í skyndihjálp. Markmið námskeiðsins er kynna nemendur fyrir grunnatriðum skyndihjálpar þannig að þau öðlis lágmarksfærni í að veita slösuðum eða veikum aðstoð í bráðatilfellum. Námskeiðið var bæði bóklegt og verklegt eins og sjá má á meðfylgjandi myndum. Það var Karl Lúðvíksson sem sá um kennsluna og þökkum við honum kærlega fyrir komuna.

Heil og sæl Á góðviðrisdögum eins og þessum finnum við að vorið nálgast. Í gær hittust nemendur 8.-10.bekkjar, hér á Skagaströnd, á sameiginlegum íþróttadegi unglinga í Austur- og Vestur - Húnavatnssýslum. Ekki var annað að heyra á okkar unglingum en að þeir hefðu skemmt sér vel og að allt hafi gengið að óskum í hinum ýmsu leikjum, fræðslu og íþróttum . Fyrirlestur var frá lyfjaeftirlitinu þar sem farið var m.a. yfir skaðsemi orkudrykkja. Dagurinn endaði á diskóteki þar sem piltarnir frá Einn og hálfur dj þeyttu skífurnar við góðar undirtektir. Myndir hér Nemendur 1.-10.bekkjar hittust í morgun og spiluðu æsispennandi BINGO. Vinningar voru glæsileg páskaegg úr Kjörbúðinni og þökkum við kærlega fyrir okkur. Myndir hér Páskafrí hefst að loknum skóladegi í dag föstudaginn 31.mars. Fyrsti skóladagur eftir páska er þriðjudagurinn 11. apríl og kennt samkvæmt stundatöflu. Við óskum ykkur gleðilegra páska. Páskakveðjur Sara Diljá og Guðrún Elsa

Dregið var í happdrætti nemenda 10.bekkjar í dag. Hér meðfylgjandi er mynd af niðurstöðunum. Við þökkum kærlega fyrir stuðninginn bæði þau fyrirtæki sem styrktu og þeir fjölmörgu sem keyptu miða. Þið sem unnuð, innilega til hamingju :) Hægt verður að nálgast vinningana í skólanum milli kl. 8:00 og 12:00

Nemendur 5. bekkjar fóru í gær í heimsókn á Heimilisiðnaðarsafnið á Blönduósi. Þar fengu nemendur kynningu á vinnuferli ullar frá rúningi að efni til að vinna úr. Þá sáu nemendur einnig týpískan undirfatnað og náttföt kvenna, sem unglingstúlkur gjarnan unnu sjálfar. Þá skoðuð nemendur einnig ýmsa gamla hluti allt fra 18. öld. Nemendur fengu með sér heim þráð sem var spunninn úr ull sem þau kembdu sjàlf og fengu að prufa vefstól. Einstaklega vel heppnuð heimsókn þar sem krakkarnir okkar voru algjörlega til fyrirmyndar. Við þökkum Heimilisiðnaðarsafninu fyrir góðar móttökur.

Í gær fengum við skemmtilega heimsókn frá fréttafólki Landans. Þau tóku viðtöl við nemendur og starfsfólk ásamt því að fylgjast með uppsetningu listinnsetningar sem er samvinnuverkefni nemenda skólans og listafólks frá Nes listamiðstöð. Þátturinn verður sýndur á RUV næstkomandi sunnudagskvöld og við hvetjum alla til að horfa.

Þriðjudaginn 14. mars var alþjóðlegur dagur stærðfræðinnar. Í tilefni hans fengu nemendur á unglingastigi að vinna skapandi verkefni sem tengja saman stærðfræði og listir. Nemendur unnu mynstur og þrívíddarteikningar út frá hringforminu og einu verkfærin sem þeir notuðu auk ritfanga voru hringfarar og reglustikur

Heil og sæl Vikan í Höfðaskóla gekk vel. Það var margt um að vera eins og gengur í skólastarfinu. Unglingarnir unnu skemmtilegt verkefni í náttúrufræði þar sem Elín Ósk Björnsdóttir kom í heimsókn, nánar um það hér. Miðstig flutti upplestur í tengslum við framsagnarkeppnina og stóðu þau sig öll með prýði. Nánar um það hér. Unglingastig fór til Reykjavíkur þar sem þau fóru á sýninguna Mín framtíð í Laugardalshöll og skemmtu sér vel. Nemendur 10. bekkjar fóru svo í áhugasviðskönnun hjá námsráðgjafa þar sem þau standa nú frammi fyrir því að ákveða hvað tekur við eftir grunnskóla. Í næstu viku verður opið hús í Höfðaskóla, fimmtudaginn 23. mars frá kl. 10:00-11:30. Engin formleg dagskrá verður en gestum og gangandi gefst kostur á að koma í heimsókn og sjá það sem nemendur eru að fást við í kennslustundum. Við vonumst til að sjá sem flesta. Við vonum að þið njótið helgarinnar Með góðum kveðjum Sara Diljá og Guðrún Elsa