Fréttir

Heil og sæl Senn er árið 2021 á enda, viðburðaríkt og margt sem hefur sett svip sinn á skólastarfið hjá okkur. Janúar og febrúar voru með rólegra móti. Veðrið var ekki til mikilla trafala og gerðum við gott úr því sem okkur var rétt. Við gerðum ýmislegt skemmtilegt þó okkur hafi verið þröngur stakkur sniðinn sökum heimsfaraldurs. Nemendafélag Höfðaskóla tók formlega til starfa og eru það nemendur á unglingastigi sem skipa stjórn þess. Nemendur á yngsta stigi heimsóttu Spákonuhof 22. janúar í kjölfar verkefnavinnu tengdri þorranum. Höfðaskóli lenti í 3. sæti á landsvísu í grunnskólakeppni Samróms og fékk verðlaun fyrir sitt framlag á Bessastöðum 27. janúar. Nemendur í 10. bekk tóku þátt í rafrænu skemmtikvöldi hjá Nemendafélagi FNV og unglingar í forritunarvali heimsóttu nemendur á yngsta stigi og kenndu þeim á Sphero. 112 dagurinn var haldinn 11. febrúar og fengum við skemmtilega heimsókn frá lögreglu, slökkviliði og björgunarsveitinni Strönd. Uppúr miðjum febrúar var unnið hörðum höndum að því að fjölga nemendum skólans þar sem fylgst var með níu hænueggjum í ferlinu frá eggi að unga og 17. febrúar var öskudagurinn þar sem hinar ýmsu verur mættu í skólann. Í mars fengu nemendur á yngsta stigi ný borð og stóla og ungarnir níu komust allir úr eggi, 100% árangur og skólastarfið með líflegra móti. Danskennsla var vikuna 15.-19. mars og þótti flestum það skemmtilegt. Framsagnarkeppni Höfðaskóla, fyrir nemendur á miðstigi, var haldin í kirkjunni. Þemavika hjá nemendum unglingastigs, ein stöð á hverjum degi í viku. Páskafríið hófst aðeins fyrr en áætlað var vegna hertra sóttvarnaaðgerða en við tökum því sem höndum ber. Í apríl var árshátíðin rafræn og Þorgrímur Þráinsson heimsótti unglingastigið með fyrirlesturinn ,,Verum ástfangin af lífinu" og nemendur í 9. og 10. bekk fóru á skyndihjálparnámskeið. Handritasamkeppni Árnastofnunar var haldin í samstarfi við Sögur- verðlaunahátíð barnanna og einn nemandi úr Höfðaskóla, Vésteinn Heiðarr Sigurðarson, var valinn sigurvegari ásamt 12 öðrum krökkum. Í lok apríl fengu nemendur 1.bekkjar hjálma að gjöf frá Kiwanis klúbbnum og 5. og 6. bekkur fóru í heimsókn á Heimilisiðnaðarsafnið á Blönduósi. Maí gekk í garð og nemendur í 1. og 2. bekk tóku honum fagnandi með sápukúlublæstri og yngsta stig fór í fjöruferð. Leiklistarval unglingastigs lauk sinni vinnu þar sem leikritið ,,Klippt og skorið - morðgáta" var tekið upp. Vegna þeirra takmarkana sem giltu um skólastarf var ekki hægt að vera með sýningar með hefðbundnu sniði heldur var hægt að kaupa upptöku af leikritinu. Höfðaskóli varð skóli á grænni grein og fékk sinn fyrsta Grænfána. Annað árið í röð komst 10. bekkur ekki í utanlandsferðina sína vegna heimsfaraldurs en þau fóru í skemmtilega ferð innanlands í staðin. Ekki var hægt að hafa sameiginleg skólaslit í lok maí þegar viðburðaríku skólaári var slitið með pompi og prakt og nemendur héldu út í sumarið. Skólaárið 2021-2022 hófst mánudaginn 23. ágúst, breyting var á skólasetningu vegna samkomutakmarkana og mættu nemendur beint í skólann en ekki í kirkjuna eins og venja var fyrir heimsfaraldur. Í september fór af stað hestaval á unglingastigi undir stjórn Höllu Maríu sem gekk vonum framar og einnig fengu nemendur unglingastigs fyrirlestur um fugla hjá Einari Ó. Þorleifssyni náttúrufræðingi hjá Náttúrustofu Norðurlands vestra. Við nýttum fallegt haustveður til útivistar og nám í gegnum leik. Október og nóvember voru með rólegra móti, nemendur á unglingastigi sáu sýninguna Vloggið á Blönduósi en Þjóðleikhúsið var á leikferð um landið og tóku þátt í valgreinadegi með nemendum úr Blöndu- og Húnavallaskóla. Samtökin 78 voru með fræðslu fyrir öll stig skólans ásamt fræðslu fyrir starfsfólk og forráðamenn. Menntabúðir voru haldnar 2. nóvember þar sem forráðamenn, ættingjar og aðrir velunnarar skólans voru hjartanlega velkomnir að kíkja í heimsókn og kynna sér hin ýmsu tæki og tól til kennslu, mæting og áhugi fóru fram úr björtustu vonum. Í byrjun nóvember var okkar árlegi flippíþróttadagur haldinn að þessu sinni var hann innandyra en það var ekki til að skemma stemninguna. Dagur íslenskrar tungu var haldinn hátíðlegur 16.nóvember og þemavika var á unglingastigi vikuna 22.-25. nóvember þar sem kennt var heimilisfræði, myndmennt, tálgun og plastvinna. Nú í desember höfum við verið að reyna brjóta upp hefðbundið skólastarf. Við fórum með yngsta stig og tendruðum ljósin á jólatrénu, fengum jólasveina í heimsókn, héldum föndurdag, söngsal, jólastund, möndlugraut og að lokum litlu jólin okkar sem voru einstaklega notaleg þrátt fyrir breytta dagskrá vegna takmarkana. Þetta ár hefur verið viðburðaríkt og óhætt að segja að við séum enn að takast á við aðstæður sem engum óraði fyrir að kæmu upp. Með samheldni og samstöðu höfum við komist í gegnum vikurnar eina af annarri og höldum því áfram á nýju ári. Við erum ótrúlega þakklátar fyrir þá þolinmæði og þann skilning sem skólasamfélagið allt hefur sýnt í þessu ástandi öllu. Við hvetjum ykkur til að vera dugleg að fylgjast með heimasíðunni okkar, við erum dugleg að setja inn fréttir og aðrar upplýsingar. Að lokum langar okkur að þakka ykkur kærlega fyrir samstarfið á árinu sem er að líða og vonum að þið eigið góð og gleðileg jól. Með góðum jólakveðjum Guðrún Elsa, Dagný Rósa og Sara Diljá

Í byrjun vikunnar kíktu rauðklæddir karlar í heimsókn til nemenda skólans, rétt aðeins til að minna á sig. Uppátæki þeirra vöktu mikla kátínu sérstaklega hjá nemendum yngsta stigs. Í gærmorgun fóru nemendur skólans ásamt starfsfólki yfir í kirkjuna og hlustuðu á jólaminningar Ingibergs Guðmundssonar. Hugrún spilaði og söng ásamt nemendum sem tóku undir af mikilli snilld. Í hádeginu var síðan boðið uppá möndlugraut sem Guðrún og Finnbogi hrærðu ásamt dyggu aðstoðarfólki. Í dag voru litlu jólin, nemendur mættu margir hverjir í sínu fínasta pússi. Þrátt fyrir að fjöldatakmarkanir hefðu komið í veg fyrir að haldið yrði jólaball í íþróttahúsinu þá var sett upp jólatré og það skreytt í anddyri skólans. Nemendur komu svo eftir bekkjum og dönsuðu þar í kring og sungu. Myndir hér Í dag lauk söfnuninni okkar til styrktar jólasjóðs Skagastrandar og Skagabyggðar, söfnuðust 70þúsund krónur sem munu án efa koma sér vel nú fyrir jólahátíðina. Þess má geta að ein amman gaf 1000kr fyrir hvert barnabarn sem hún á í skólanum og kunnum við henni okkar bestu þakkir. Þetta ár hefur verið viðburðarríkt og óhætt að segja að við séum enn að takast á við aðstæður sem engum óraði fyrir að kæmu upp. Með samheldni og samstöðu höfum við komist í gegnum vikurnar eina af annarri og höldum því áfram á nýju ári. Við hvetjum ykkur til að vera dugleg að fylgjast með heimasíðunni okkar, við erum dugleg að setja inn fréttir og aðrar upplýsingar. Að lokum langar okkur að þakka ykkur kærlega fyrir samstarfið á árinu sem er að líða og vonum að þið eigið góð og gleðileg jól. Með jólakveðjum Guðrún Elsa, Sara Diljá og Dagný Rósa

Nemendur yngsta stigs koma heim í dag með fagurlega skreytt piparkökuhús. Myndirnar hér meðfylgjandi sína einbeitningu og þolinmæði sem einkenndi nemendurna meðan á verkinu stóð.

Heil og sæl Vikan í Höfðaskóla gekk vel og það var margt um að vera. Snjálfur álfur hefur verið í heimsókn á yngsta stigi og tekið upp á ýmsu. Á miðvikudaginn var fyrsti söngsalurinn okkar í desember og fengum við fjórar stúlkur af unglingastigi til að leiða sönginn, þann daginn bauð einnig nemendafélagið öllum í vöfflukaffi. Í dag var svo boðið var upp á heitt og kalt kakó með rjóma í nestistímanum. Í næstu viku verður sundkennsla á mánudag en á þriðjudag fara nemendur í íþróttir í staðin svo það er mikilvægt að hafa með sér íþróttafötin. Við ætlum að bralla ýmislegt síðustu dagana fyrir jól. Á mánudag verður verður smá jólagleði fyrir yngsta stig. Á miðvikudag verður jólasöngsalur og rautt þema, jólapeysur, jólasokkar, jólahitt og jóla þetta :) Á fimmtudag ætlum við að eiga notalega jólastund saman. Við förum í kirkjuna, hlustum á jólasögu, syngjum nokkur jólalög og höfum gaman. Í hádeginu fáum við svo möndlugrautinn. Ein möndlugjöf verður fyrir hvern bekk og það verður spennandi að sjá hverjir verða hinir heppnu í ár :) Það verður ekki matur í Fellsborg þennan dag og enginn skóli eftir hádegi hjá mið- og unglingastigi. Frístund verður með hefðbundnu sniði. Á föstudag verða svo litlu jólin okkar. Nemendur mæta í skólann kl. 9:00 og verða til 12:00. Við ætlum að dansa í kringum jólatré þar sem Hugrún Sif spilar undir fyrir okkur og Ástrós Elís leiðir sönginn eins og svo oft áður :) Engin frístund þennan dag heldur halda allir heim í jólafrí á hádegi. Frekari upplýsingar um litlu jólin munu berast foreldrum/forráðamönnum frá umsjónarkennurum. Höfðaskóli er einstaklega heppinn að eiga hæfileikaríkt og gott fólk í kringum sig sem kemur til aðstoðar við hin ýmsu tilefni. Við erum komin í jólaskap og ætlum að njóta síðustu daganna fyrir frí saman. Við vonum að þið njótið helgarinnar Með góðum jólakveðjum Guðrún Elsa og Dagný Rósa

Nemendafélag Höfðaskóla stóð fyrir vöfflukaffi í gær, miðvikudaginn 8.des. Frá kl. 8:20 um morguninn stóðu þau í ströngu, hrærðu og steiktu eins og vindurinn. Allir nemendur og kennarar skólans fengu vöfflu, rjóma, súkkulaði og sultu. Einstaklega skemmtilegt framtak og nýttum við söngstund dagsins til að klappa vel fyrir þessum flottu krökkum.

Nemendur í 1.-4.bekk nýttu myrkrið í gærmorgun og fóru í leiðangur. Komu við hjá Haffa Páls og fengu að berja nýja slökkviliðsbílinn augum og þar á eftir fóru þau að eldstæðinu við Bjarmanes og grilluðu sér sykurpúða. Við öll kunnum vel að meta liðlegheit Haffa og færum honum þakkir fyrir. Myndir hér

Litlu jól nemenda verða 17. desember og ætlum við að halda okkur við fyrirkomulagið sem við tókum upp fyrir tveim árum hvað varðar pakkaskiptin. Í ár hafa nemendur kosið að styrkja Jólasjóðinn, hann er til að aðstoða fjölskyldur og einstaklinga á svæðinu sem minna mega sín, og koma nemendur ekki með pakka heldur óskum við eftir því að hvert heimili leggi 1000 krónur í púkk, ef heimilin hafa tök á. Starfsfólk skólans mun einnig styrkja Jólasjóðinn í stað þess að skiptast á gjöfum. Á morgun fer elsta systkini á hverju heimili heim með umslag merkt verkefninu og þar má setja aurinn í og loka fyrir áður en því er skilað aftur í skólann. Styrknum verður svo skilað til Jólasjóðsins á litlu jólunum. Í fyrra fengum við fregnir af því að fleiri en heimili grunnskólabarna vildu leggja söfnuninni lið. Ef einhverjir bæjarbúar vilja taka þátt í þessu verkefni með okkur og leggja málefninu lið er hægt að hafa samband við skólastýrur í síma 4522800 eða á gudrunelsa@hofdaskoli.is og dagnyrosa@hofdaskoli.is

Heil og sæl Vikan í Höfðaskóla gekk vel og það var margt um að vera. Snjálfur álfur hefur verið í heimsókn á yngsta stigi og tekið upp á ýmsu. Nemendur á yngsta stigi fóru síðan á Hnappstaðatún í vikunni og nemendur í fyrsta bekk kveiktu á jólatré okkar Skagstrendinga. Stærðfræðijóladagatal er á unglinga- og miðstigi þar sem nemendur fá eina þraut á dag til að leysa, setja svarið sitt í kassa og áður en við förum í jólafrí verður dregið úr réttum svörum og veitt verðlaun. Við enduðum vikuna á að gera okkur glaðan dag og höfðum jólaföndur frá kl. 10:00-12:00 þar sem nokkrar stöðvar hér og þar um skólann voru í gangi og nemendur gátu flakkað á milli. Þá var einnig í boði að horfa á jólamynd fyrir þá sem ekki vildu föndra. Myndir hér. Í næstu viku verður söngur á "sal" á miðvikudaginn ásamt því að nemendafélagið ætlar að steikja vöfflur í kaffinu og gefa öllum nemendum skólans. Við vonum að þið njótið annarrar helgar aðventu. Jólakveðja Guðrún Elsa og Dagný Rósa

Fulltrúi fyrsta bekkjar í Höfðaskóla sá að þessu sinni um að tendra ljósin á jólatré okkar Skagstrendinga á Hnappataðatúni. Nemendur yngsta stigs dönsuðu svo í kringum jólatréð og sungu jólalög.

Snjálfur álfur mætti nú í byrjun vikunnar á yngsta stig. Álfurinn er þekktur fyrir hin ýmsu uppátæki og verður spennandi að fylgjast með honum á komandi dögum.